Aba bakinnyi bombi basanzwe babanza mu kibuga muri iyo kipe ntabwo bashyizwe ku rutonde rw’abakinnyi bazakina CECAFA, ubuyo bozi bwa Rayon Sport bukaba butangaza ko basigaye kubera imvune bafite.

Hategekimana Afphrodis na Usengimana bari bahamagawe mu ikipe y’igihugu Amavubi yakinnye na Algeria ku cyumweru, ariko bahavana imvune.

Hategekimana Aphrodis ‘Kanombe’.

Hategekimana we ntabwo yigeze akina umukino wa Algeria kuko yari yavunitse mbere y’uwo mukino ubwo yari mu myitozo, naho Usengimana we akaba yaravunikiye muri uwo mukino wa Algeria, ariko yarawukinnye arawurangiza.

Uretse abo bakinnyi babiri, abandi bakinnyi bose ba Rayon Sport basanzwe bakina ngo ni bazima kandi bagomba kwitabira iryo rushanwa.

Bitewe n’uko ikipe ya rayon Sport yatumiwe muri iryo rushanwa hutihuti, abakinnyi bayo berekeje muri Soudan mu byiciro bibiri, kuko bamwe bari baramaze no kujya mu biruhuko.

Icyiciro cya mbere cy’abo bakinnyi cyagiye mu ujoro ryo ku cyumweru tariki 16/6/2013, abandi bagenda kuri uyu wa mbere.

Usengimana Faustin.

Rayon Sport yatwaye igikombe cya shampiyona uyu mwaka, yatumiwe muri iyi mikino ya CECAFA nyuma y’aho amwe mu makipe yagombaga kuyitabira afatiye icyemezo cyo gusezera mu irushanwa ry’uyu mwaka.

Nubwo ariko Rayon Sport yatumiwe ikererewe, umuyobozi wayo Murenzi Abdallah avuga ko bahaye umutoza n’abakinnyi inshingano n’intego yo kuzana icyo gikombe, bakigaragaza mu karere kandi bakerekana ko batwaye igikombe cya shampiyona mu Rwanda babikwiye.

Rayon Sport yashyizwe mu itsinda rya kabiri (B) rigizwe na Ports yo muri Djibouti, Express yo muri Uganda na Electric yo muri Chad, ikazakina umukino wayo ubanza na Electric ku wa kane tariki 20/06/2013.

Theoneste Nisingizwe