Ikipe y’u Rwanda yagombaga gukina umukino ubanza na Congo Brazzaville zari mu itsinda rimwe, ariko nyuma Congo iza kubura mu irushanwa kubera ko abakinnyi bayo babuze impapuro zibemerera kwinjira ku butaka bw’Ubufaransa bita visa.

Umutoza w’ikipe y’u Rwanda Richard Tardy avuga ko n’ubwo mu mukino wayo wa mbere Canada yatsinzwe n’Ubufaransa ari ikipe ikomeye ku buryo gukina nayo bisaba kwitonda.

“Ikipe ya Canada irakomeye. N’ubwo Ubufaransa bwayitsinze ibitego 4-1 umukino wayo ni mwiza kandi ikinisha imbaraga ku buryo ishobora kutugora ariko namaze gutegura abakinnyi b’u Rwanda.”

Umutoza w’ikipe y’u Rwanda yavuze ko ikipe ya Canada ishaka gutsinda u Rwanda ngo ibone amanota atatu, ariko ngo n’ikipe y’u Rwanda irakora ibishoboka byose kugira ngo ruzabashe guhatanira umwanya wa mbere mu itsinda n’Ubufaransa.

Kuba mu itsinda hazazamuka ikipe imwe gusa igahita ijya muri ½ cy’irangiza, bivuze ko kugira ngo u Rwanda ruhagere bisaba gutsinda Canada ndetse n’Ubufaransa bazakina ku wa kabiri tariki ya 10/09/2013.

Umutoza Tardy avuga ko bitoroshye gutsinda Ubufaransa buri ku mwanya wa kabiri ku isi mu batarengeje imyaka 20, ariko ngo agomba kubanza gutsinda Canada, akabona gutegura umukino w’Ubufaransa.

Uretse Nsabimana Eric wavunitse na Rwatubyaye Abdoul watorotse, abandi bakinnyi b’ikipe y’u Rwanda barimo umunyezamu Ntaribi Steven na Turatsinze Heritier bari baravunitse bamaze gukira ku buryo bakina uwo mukino wa Canada.

Gusa umunyezamu Ntaribi, igihe cyose umutoza yahitamo ko ariwe uja mu izamu, yakina yambaye ikintu kumukingira isura (Masque), kuko yakomeretse ku zuru.

Theoneste Nisingizwe