Bimwe mu bigwi bya Yamen Zelfani, umutoza mushya wa Rayon Sports

Uyu mugabo w’imyaka 43 y’amavuko, afite uburambe bw’imyaka 11 nk’umutoza kuko aka kazi yagatangiye mu 2012,akaba yasinye amasezerano y’umwaka umwe atoza Rayon Sports.

Yamen Zelfani kuva yatangira gutoza mu 2012, yahereye mu ikipe ya Abha Club yo muri Saudi Arabia, yabayemo kugeza mu 2015.

Kuva mu 2015 aho yanyuze hose ntabwo arenza umwaka ahatoza, ariko akaba umunyabikombe.
Kuva yatandukana n’ikipe ya Abha Club mu 2015, amaze gutoza amakipe umunani aho muri uwo mwaka yahise ajya gutoza muri Mauritanie mu ikipe ya FC Nouadhibou, asoreza ku mwanya wa kabiri muri shampiyona ya 2015-2016.

Mu 2018 kugeza 2019 yatoje ikipe ya Al Merrikh yo muri Sudan maze ayifasha kwegukama igikombe kiruta ibindi (Super Cup) na shampiyona ya 2018-2019. Yahise ayivamo ajya mu gihugu cya Oman mu ikipe ya Dhofar FC, ayifasha gutwara igikombe cya Super Cup 2019.

Mu 2020 Zelfani yavuye muri Oman ajya gutoza ikipe ya JS Kabylie yo muri Algeria, atamazemo igihe kirerkire kuko mu 2021 yagiye muri AS Soliman y’iwabo muri Tunisia, aho ubwo yayitozaga muri Mata na Gicurasi uwo mwaka, yatowe nk’umutoza mwiza w’ukwezi.

Yamen Zelfani

Yamen Zelfani yavuye iwabo mu 2021 ajya mu gihugu cya Saudi Arabia mu ikipe ya Ya Al Kawkab mu cyiciro cya kabiri, mu gihe aje muri Rayon Sports avuye gutoza ikipe ya Al Talaba yo muri Iraq.

Muri rusange Yamen Zelfani kuva yatangira gutoza mu 2012 amaze gutwara ibikombe bitatu, akaba ategerejweho guhesha Rayon Sports shampiyona iheruka mu 2019, ndetse no kuyifasha mu mikino Nyafurika ya CAF Confederation.

MENYA UMWANDITSI

Jean Jules Uwimana

Umunyamakuru

@UwimanaJeanJul1

Reba inkuru zose nanditse ( 764 )