Umukino w’u Rwanda U17 na Botswana uzakinirwa mu mujyi wa Moloporore wegeranye n’umurwa mukuru Gaborone ku wa gatanu tariki 12/10/2012, naho umukino wo kwishyura ukazabera i Kigali tariki 20/10/2012.

Mu gihe u Rwanda aribwo rutangiye amarushanwa yo guhatanira itike y’igikombe cya Afurika, ikipe ya Botswana yo yayatangiye kare, kuko yageze muri icyi cyiciro cya kabiri nyuma yo gusezerera Malawi kuri penaliti 4-2 nyuma y’aho amakipe yombi yanganyaga igiteranyo cy’ibitego 3-3 mu mikino ibiri bakinnye.

Nubwo ikipe y’u Rwanda aribwo igitangira amarushanwa, umutoza wayo Richard Tardy ayifitiye icyizere kuko ngo azashingira ku myitozo amaze iminsi aha abasore be, kandi ngo ubwo bakinaga na Nigeria imikino ibiri ya gicuti ikabatsinda ibitego 8-0 bahavanye inararibinye izabafasha guhangana n’amakipe akomeye bazahura.

Ikipe izatsinda hagati y’u Rwanda na Botswana izakina n’izaba yarokotse hagati ya Sudan na Algeria mu cyiciro cya gatatu ari nacyo cya nyuma, ikipe itsinze muri icyo cyiciro ikazahita ibona itike yo gukina igikombe cya Afurika kizabera muri Maroc umwaka utaha.

Ikipe y’u Rwanda yegukanye umwanya wa kabiri mu gikombe cya Afurika giheruka kubera mu Rwanda muri 2011, nyuma yo gutsindwa na Burkina Faso ku mukino wa nyuma. Uwo mwanya wa kabiri kandi wahesheje u Rwanda itike yo kwitabira igikombe cy’isi cyabereye muri Mexique muri uwo mwaka.

Theoneste Nisingizwe