Ikipe ya Liverpool yakagombye kuba yagize ikizere cyo kucyegukana muri iyi week end ishize, ntibyayikundiye kuko itorohewe na Chelsea ikayitsinda ibitego 2-0. Kuri ubu, nyuma y’aho Manchester City nayo itsinze umukino kandi ifite n’ikirarane, Liverpool yokejwe igitutu n’aya makipe yombi.

Chelsea ntiyoroheye Liverpool iyibuza amahirwe yo kwizera igikombe cya shampiyona.

Liverpool iracyari iya mbere n’amanota 80, Chelsea iya kabiri n’amanota 78 naho Manchester City iya 3 n’amanota 77. Kuri ubu, mu gihe hasigaye imikino 2 ya Shampiyona kuri aya makipe uretse Manchester City ifite ikirarane kimwe cyayo, biragoye kwemeza muri zo ikipe izatwara igikombe.

Ku rundi ruhande, umukinnyi w’ikipe ya Liverpool, Luis Suarez w’imyaka 27 wo mu gihugu cya Uruguay, yatowe nk’umukinnyi w’umwaka witwaye neza muri shampiyona y’Ubwongereza. Ni mu gihe mu mikino igera kuri 31 yakinnye, uyu mukinnyi utaha izamu yatsinzemo ibitego 30, agatanga imipira 12 ihita ivamo ibitego.

Ibi byanyuze benshi mu Bwongereza bituma atorwa nk’umukinnyi mwiza w’umwaka mu Bwongereza awusimbuyeho Garenth Bale, wakiniraga Tottenham.

Umutoza Ryan Giggs wasimbuye by’agateganyo David Moyes wirukanwe.

Mu ikipe ya Manchester United, umutoza mushya Ryan Giggs yatangiye aka kazi ahirwa n’umukino wa mbere yakinnye, aza gutsinda ibitego 4-0 ikipe ya Norwich Ciy bari bahuye.

Kuri ubu benshi mu bafana bategereje icyo uyu mutoza wabaye umukinnyi w’intyoza muri Manchester United, azageza iyi kipe yakiniye akaba ayibereye n’umutoza.

Safari Viateur