Sina Jerome mu gice cya mbere na Muganza Isaac mu gice cya kabiri, batsindiye ikipe ya Rayon Sports yakinaga umukino wayo wa mbere nyuma yo gusezerera umutoza Andy Mfutila maze Sosthene Habimana agatangirana n’intsinzi yari yarabuze i Nyanza.

Gutsinda uyu mukino, byahise bishyira Rayon Sports ku mwanya wa gatatu ku rutonde rw’agateganyo rwa shampiyona aho ubu igejeje amanota 25 mu mikino 15 imaze gukina muri shampiyona.

Musanze na yo yagiye ibona amahirwe yo gutsinda

I Rubavu kuri stade Umuganda, ikipe ya APR FC yo yari yakiriwe na Etincelles mu mukino wagombaga kwerekana aho shampiyona iri kugana. Kuri iki kibuga, ikipe ya Marines yari yaraye ihatsindiye As Kigali yari iya kabiri muri shampiyona, bityo intsinzi y’iyi kipe y’ingabo z’igihugu yagombaga gusiga ikinyuranyo kinini hagati yayo n’ikipe iyikurikiye.

APR FC itari ifite umutoza mukuru Petrovic wamaze gusezera, yafunguye n’ubundi amazamu ku munota wa 18 w’umukino ubwo Iranzi Jean Claude yateraga ishoti mu izamu ryari ririnzwe na Mukadi Freddy, maze uyu munyezamu agafata umupira nabi byatumye ahindukira inshundura zinyeganyega.

Aya makipe ya APR FC na Rayon Sports akaba yakinaga imikino yayo yanyuma dore ko mu mpera z’iki cyumweru azaba yerekeje muri Mozambique no muri Cameroon kwitabira imikino nyafurika.

Uko imikino ya shampiyona yagenze ku munsi wa 16

Kuwa Gatandatu, 07/02/2015

• Mukura 0-1 Kiyovu
• Marines 2-0 AS Kigali
• Isonga 1-0 Espoir
• Amagaju 2-3 Gicumbi

Ku Cyumweru, 08/02/2015

• Etincelles 0-1 APR
• Musanze 0-2 Rayon Sports

Urutonde rwa shampiyona

1. APR FC 15 35
2. AS Kigali 15 28
3. Rayon S. 15 25
4. Police FC 14 24
5. Gicumbi 16 24
6. Amagaju 16 23
7. Marines 15 21
8. SC Kiyovu 15 20
9. Espoir 16 18
10. Sunrise 14 17
11. Mukura 15 15
12. Musanze 15 14
13. Etincelles 15 14
14. Isonga 15 07

Jah d’eau DUKUZE