Rayon Sport igomba kuzahagararira u Rwanda mu mikino ihuza amakipe yabaye aya mbere iwayo muri Afurika (CAF Champions League), irashaka ba rutahizamu bakomeye bazayifasha.

Iyo kipe yatwaye igikombe cya shampiyona iheruka, imaze igihe kinini ishaka kugura Meddie kagere ariko we agakomeza kwanga kuyisinyira kuko arimo gushaka amakipe hanze y’u Rwanda cyane cyane mu gihugu cya Liban.

Umuvugizi wa Rayon Sport Gakwaya Olivier yadutangarije ko bafite icyizere cy’uko kagere azabakinira, ndetse ngo bamaze gutanga izina rye muri FERWAFA ku rutonde rw’abakinnyi ba Rayon Sport bazakina shampiyona izatangira tariki 28/09/2013.

Gakwaya avuga ko Kagere, wahoze akina muri Police FC, nabura ikipe hanze y’u Rwanda azahita ajya muri Rayon Sport, kuko na Miliyoni 9 z’amanyarwanda yari yabasabye ngo abasinyire, bamaze kuyamwemerera.

Rayon Sport kandi irashaka kugura Kabange Twite wahoze ari Rutahizamu wa APR FC akaza kuyivamo ubwo iyo kipe yafataga icyemezo cyo gusezerera abakinnyi b’abanyamahanga.

Kabange, impanga ya Mbuyu twite, amaze iminsi ari mu gihugu cye cy’amavuko muri Repubulika Iharanira Demukarasi ya Congo, akaba yakinaga muri Sait Eloi Lupopo.

N’ubwo rRyon Sport imwifuza ndetse nawe akaba ashaka kuyerekezamo, Umuvugizi wa Rayon Sport yadutangarije ko bikigoranye, kuko ngo ikipe ya Lupopo ivuga ko agifitanye nayo amasezerano, bivuze ko Rayon Sport igomba kumugura muri Lupopo kandi batarabyiteguye.

Rayon Sport iramutse ibonye umwe muri abo bakinnyi bombi, yaba yiyongera ku bakinnyi benshi yaguze mbere y’uko shampiyona itangira, ndetse ikaba yaratangiye kubamenyereza ikina imikino ya gicuti. na Esperance FC igitego, Kiyovu Sport ndetse na Mukura.

Umukino wayo wa mbere muri shampiyona ya 2013/2014, Rayon Sport izakina na Gicumbi FC kuri Stade Amahoro i Remera.

Theoneste Nisingizwe