Kuri Stade ya Kigali i Nyamirambo, Rayon Sport ihagaze neza cyane muri iyi minsi yakoze ibyo abakunzi bayo bari bayitegerejeho, itsinda Rwamagana City iyinyagiye ibitego 7-0.

Ibi bitego bya Rayon Sports harimo bitatu byatsinzwe na Pappy Kamanzi, bibiri bya Fuadi Ndayisenge, mu gihe Hamisi Cedric na Faustin Usengimana batsinze kimwe buri wese.

Kiyovu Sport nk’ikipe ifite inararibonye muri ruhago mu Rwanda, yatunguwe no gusezererwa ku ikubitiro na Musanze FC iyitsinze kuri penaliti enye za Musanze kuri ebyiri za Kiyovu Sport nyuma yo kunganya ubusa ku busa mu gihe cy’iminota 90 y’umukino.

Kiyovu Sport yasezererwe ikurikira Police FC nayo yasezererwe ku ikubitiro itsinzwe na AS Muhanga kuri za penaliti, kimwe na La Jeunesse nayo yasezerewe na Pepiniere yo mu cyiciro cya kabiri nabwo hitabajwe za penaliti.

Mu yindi mikino itangiza igikombe cy’Amahoro yabaye ku cyumweru, Etincelles FC yapfunyikiye Kaminuza Nkuru y’u Rwanda ibitego 8-0.

Ikipe ya Etincelles FC yari imaze iminsi ihagaze nabi yorohewe cyane no gutsinda itababariye Kaminuza y’u Rwanda, nayo itarimo kwitwara neza muri iki gihe aho isanzwe ikina mu cyiciro cya kabiri.

Mu yindi mikino, ikipe ya SEC Academy yatsinze Gicumbi FC igitego 1-0, Amagaju asezerera Akagera FC ku bitego 2-1, naho Vision FC itsinda Interforce FC igitego 1-0. Espoir FC yatsinze Sorwathe FC ibitego 3-0, naho Aspor FC itsinda United Stars ibitego 3-0.

Ikipe izatwara igikombe cy’Amahoro uyu mwaka, izahagararira u Rwanda mu mikino ihuza amakipe yatwaye ibikombe iwayo muri Afurika (CAF Confederation Cup) muri 2014.

Theoneste Nisingizwe