Mu kiganiro yagiranye n’Itangazamakuru, Nshimiyimana yatangaje ko mu byumweru bibiri abakinnyi be bamaze i Rubavu bitegura Ethiopia, bakosoye amakosa bakunze gukora bagatsindwa ibitego mu buryo budasobanutse, kandi ngo icyo yameranyijwe nabo ni ugukinana ubwitange kuva umukino utangiye kugeza urangiye.

Kuba u Rwanda rwaratsinzwe igitego 1-0 mu mukino ubanza wabereye muri Ethiopia, u Rwanda rurasabwa gutsindira i Kigali ibitego 2-0 kugirango rwizere kujya muri CHAN, kandi Nshimiyimana ngo asanga bishoboka abakinnyi be nibumvira inama amaze iminsi abagira.

“Turasabwa imbaraga nyinshi haba mu kugarira izamu ndetse no mu gusatira, tukirinda ko badutsindira hano igitego kuko cyaba kirimo ibitego bibiri bikaba byatugora kubyishyura.

Kuba tuzakinira mu rugo ni amahirwe ariko ntacyo twageraho tudakoranye ubwitange. Abakinnyi bose nibakinana ishyaka kandi bakumvikana hagati yabo, intsinzi izaboneka.”

Kuba umukino uzahuza u Rwanda na Ethiopia, uzabera kuri Stade ya Kigali i Nyamirambo ngo ntabwo ari icyemezo cy’ishyirahamwe ry’umupira w’amaguru mu Rwanda nk’uko benshi mu bakurikirana umupira w’amaguru bavuga ko i Nyamirambo Amavubi akunda kuhagirira amahirwe.

Nshimiyimana avuga ko, ahubwo ngo ari icyifuzo cy’abakinnyi, kuko ngo bakunda gukinira ku bwatsi bwa kijyambere.

Muri uwo mukino uzatangira saa cyenda n’igice, Nshimiyimana azaba adafite Ntamuhanga Tumaini, Jimmy Mbarana Mutuyimana Mussa na Mbaraga Jimmy bafite imvune.

Ikipe izatsinda hateranyijwe umusaruro wo mu mukino yombi izahita ibona itike yo kuzakina igikombe cya Afurika gikinwa n’abakinnyi bakina mu bihugu byabo (CHAN) izabera muri Afurika y’Epfo muri Mutarama 2014.

Theoneste Nisingizwe