Henriquez w’imyaka 18 wakiniraga ikipe yitwa Universidad de Chile, agiye gukinira Old Trafford aguzwe miliyoni enye z’ama Pounds.

Nubwo uyu musore atavuzwe cyane mu itangazamakuru, ni umuhanga mu gutaha izamu, kuko ku myaka 18 afite yatsinze ibitego 11 mu mikino 17 yakiniye Universidad mu mwaka w’imikino wa 2012 ndetse anayihesha igikombe.

Uyu musore agiye muri Manchester United asanga abandi bakinnyi babiri: Shinji Kagawa and Nick Powell umutoza Sir Alex Ferguson amaze kugura. Ikinyamakuru Dailymail dukesha iyi nkuru kivuga ko ashaka kongeraho rutahizamu wa Arsenal, Robin Van Persie, mbere y’uko icyi cyumweru kirangira.

Nubwo umutoza wa Arsenal, Arsene Wenger, ashaka kugumana uyu musore w’Umuholandi akaba na kapiteni wa Arsenal, Ferguson utoza Manchester United na we akomeje gushakisha uko yamwegukana, dore ko uwo musore atagishaka gukina muri Arsenal kandi n’amasezerano afitanye na yo asigaje umwaka umwe gusa.

Mu rwego rwo gushakisha uko yagure Van Persie w’imyaka 29, Ferguson aherutse kugirana ikiganiro cy’ibanga na Wenger ku bijyanye n’igurishwa rya Van Persie. Wenger avuga ko adashobora kugira icyo avugana n’abantu bo muri Machester igihe cyose amafaranga bashaka gutanga ataragera kuri miliyoni 30 z’ama Pounds.

Theoneste Nisingizwe