Umukinnyi iza ku mwanya wa mbere mu gutsinda ibitego byinshi muri UEFA Champions League ni Raul Gonzales wo mu gihugu cya Espagne n’ibitego 71 mu mikino 144 yakinnye muri iri rushanwa kuva mu mwaka w’1995-2011. Uyu mukinnyi yatsinze ibitego 66 akinira ikipe ya Real Madrid yo muri Espagne, atsinda ibitego 5 akinira ikipe ya Schalke04.

Umukinnyi wa kabiri ni Umuholande Ruud Van Nisterlooy n’ibitego 60. Mu ikipe ya PSV Eindhoven yatsinze ibitego 9, muri Manchester United yatsinze ibitego 38 naho muri Real Madrid atsinda ibitego 13. Akaba yarakinnye guhera mu mwaka wa 1998-2009.

Ku mwanya wa 3 haza umukinnyi Andriy Schevchenko ukomoka mu gihugu cya Ukraine n’ibitego 59. Mu ikipe ya Dynamo Kiev yatsinze ibitego 22, muri AC Milan atsinda ibitego 33 naho muri Chelsea atsinda ibitego 4. Akaba yarakinnye mu mwaka w’1994-2011.

Ku mwanya wa 4 haza Lionel Messi n’ibitego 58. Ibi bitego byose yabitsindiye muri FC Barcelone aho akina kuva mu mwaka wa 2004 kugeza ubu; nk’uko tubikesha Wikipedia.

Lionel Messi ukomoka mu gihugu cya Argentine ahitwa i Rosario yavutse kuwa 24 Kamena 1987. Messi yaje azanye n’ababyeyi be bimukiye muri Espagne nyuma y’aho bari bahunze ibihe by’ubukungu byari byifashe nabi muri Argentine.

Ku myaka 25 Lionel Messi yaje mu bakinnyi 5 ba mbere batsinze ibitego byinshi muri UEFA Champions League.

Umukinnyi wa 5 ni Thierry Henry w’umufaransa n’ibitego 51. Akaba yarakinnye mu makipe nka Monaco aho yatsindiye ibitego 7, Arsenal aho yatsindiye ibitego 35 na FC Barcelone aho yatsindiye ibitego 9.
Akaba ari ukuva mu mwaka w’1997 kugeza mu mwaka w’2012.

Umukinnyi wa 6 ni umutaliyani Filippo Inzaghi n’ibitego 50. Naho uwa 7 ni Alfredo Di Stefano wo mu gihugu cya Argentine n’ibitego 49, hakaza ku mwanya wa 8 umukinnyi Eusebio wo mu gihugu cya Portugal n’ibitego 47, ku mwanya wa 9 haza kizigenza w’ikipe ya Real Madrid Christiano Ronaldo nawe ufite ibitego 47. Ku mwanya wa 10 haza umukinnyi Alexandro Del Pierro wo mu gihugu cy’Ubutaliyani n’ibitego 44.

Umukinnyi Didier Drogba ukomoka muri Cote d’Ivoire aza ku mwanya wa 11 n’ibitego 39, uwa 12 Fernando Morientes wo muri Espagne n’ibitego 39, Ferenc Puskas wo muri Hongrie n’ibitego 35 ku mwanya wa 13, ku mwanya wa 14 Gerd Muller w’umudage n’ibitego 34, ku mwanya wa 15 David Trezeguet n’ibitego 32.

Ku mwanya wa 16 Francisco Gento wo muri Espagne n’ibitego 32, ku mwanya wa 17 Sergio Rebrov n’ibitego 31 wo muri Ukraine. Ku mwanya wa 18, haza Rivaldo wo muri Bresil n’ibitego 31,ku wa 19 haza Zlatan Ibrahimovic wo mu gihugu cya Suede n’ibitego 31,ku mwanya wa 20 hakaza Samuel Eto Fils umunya Cameroun n’ibitego 30.

Safari Viateur