Ibi Kiyovu Sports yabitangaje inyuze ku mbuga nkoranyambaga zayo ivuga ko yasinyishije Petros Koukouras.

Yagize iti" Uyu munsi twasinyishije umutoza mukuru, izina rye ni Petros Koukouras."

Umugereki Petros Koukouras ni we mutoza mushya wa Kiyovu Sports

Petros Koukouras ni umutoza wavutse mu mwaka w’i 1988 kuri ubu akaba afite imyaka 34 y’amavuko.

Bigaragara ko yatangiye gutoza mu 2018 mu ikipe ya Pacific Heroes ubu ikina icyiciro cya kabiri muri Ghan,a aho yahawe akazi tariki ya 10 Werurwe 2018 asoza amasezerano tariki 15 Mutarama 2019.

Nyuma yo kuva muri iyi kipe tariki ya 01 Nyakanga 2019 yahawe akazi ko kuba umutoza wungirije mu ikipe y’igihugu ya Sudani y’Epfo amasezerano arangira tariki 30 Kamena 2020.

Tariki 1 Werurwe 2021 yasubiye mu ikipe ya Pacific Heroes muri Ghana yongera kuyivamo tariki 31 Kanama 2021.

Ntabwo ari ubwa mbere aje gutoza muri Afurika y’i Burasirazuba.

Petros Koukouras aheruka kwirukanwa mu ikipe ya Villa SC yo muri Uganda mu 2022.

Petros Koukouras nyuma yo kuva muri Ghana ku nshuro ya kabiri, tariki ya 01 Nzeri 2021 yahise asinyira ikipe ya Villa SC yo muri Uganda, iyi kipe yayitoje umwaka umwe w’imikino wa 2021-2022. Uyu mwaka ariko ntabwo wamuhiriye kuko nyuma yo gusoreza ku mwanya wa 12 afite amanota 33 tariki 23 Kamena 2022 yahise yirukanwa muri iyi kipe.

Kiyovu Sports yatandukanye n’abakinnyi benshi b’inkingi za mwamba yagenderagaho iri kwiyubaka yitegura shampiyona ya 2023-2024, iteganyijwe gutangira tariki 18 Kanama 2024.

MENYA UMWANDITSI

Jean Jules Uwimana

Umunyamakuru

@UwimanaJeanJul1

Reba inkuru zose nanditse ( 828 )