UEFA Champions League: Real Madrid yasezereye PSG, Karim Benzema na Kylian Mbappe bakora amateka

Mu ijoro ryakeye ryo ku wa 9 Werurwe 2022, nibwo habaye umukino wa 1/8 cya UEFA Champions League ikipe ya Real Madrid yatsinzemo PSG ibitego 3-1, iyisezerera ku giteranyo 3-2.

Benzema na bagenzi be bishimira intsinzi
Benzema na bagenzi be bishimira intsinzi

Ni mu mukino wo kwishyura wabereye kuri Estadio Santiago Bernabeu mu gihugu cya Espagne, Real Madrid ikaba yari yatsinzwe umukino ubanza wari wabereye mu gihugu cy’u Bufaransa muri Gashyantare 2022.

Ikipe ya Real Madrid yagiye gukina uwo mukino isabwa gutsida ikinyuranyo nibura cy’ibitego bibiri, ibi nibyo yakoze kuko n’ubwo ku munota wa 39 Kylian Mbappe ku mupira yahawe na Neymar Junior, yatsindiye PSG igitego cya mbere ariko mu gice cya kabiri Real Madrid yagaragaje ubukombe bwayo, maze ibifashijwemo na rutahizamu Karim Benzema watsinze ibitego bitatu wenyine ku munota wa 61, 76 na 78, isezerera Paris Saint Germain ku giteranyo cy’ibitego 3-2 mu mikino yombi.

Muri uwo mukino Real Madrid yakoreyemo amateka kuko iyo kipe mbere yagiye gukina, mu nshuro icumi (10) yaherukaga gukina muri UEFA Champions League mu byiciro byo gukuranamo, maze igatsindwa umukino wa mbere nk’uko byari byagenze mu mukino ubanza itsindwa na Paris Saint Germain igitego 1-0.

Karim Benzema yakoze amateka atsinda ibitego bitatu
Karim Benzema yakoze amateka atsinda ibitego bitatu

Muri izo nshuro zose Real Madrid ntiyari yarashoboye gukomeza mu cyiciro gikurikira, inshuro icyenda (9) zose nyuma y’umukino wo kwishyura uretse mu mwaka w’imikino wa 2015-2016 ubwo yakomezaga isezereye ikipe ya VFL Wolfsburg, nabwo ku giteranyo cy’ibitego 3-2 muri ¼, ibi ikaba ibikoze ku nshuro ya kane.

Karim Benzema watsinze ibitego bitatu byose Real Madrid yabonye, uyu mukino wari umukino wa 500 yujuje abanza mu kibuga mu ikipe Real Madrid, ibi bikaba byamugize umukinnyi wa kabiri w’umunyamahanga ubikoze nyuma ya Roberto Carlos, wabanje mu kibuga imikino 524 muri iyi kipe y’Ibwami.

Karim Benzema kandi ku myaka 34 n’iminsi 80, nyuma yo gutsinda ibitego bitatu yabaye umukinnyi wa mbere ukuze cyane watsinze ibitego bitatu (3) mu mukino umwe mu mateka y’irushanwa rya UEFA Champions League, ibyo bitego bitatu kandi byatumye agira ibitego 67 amaze gutsindira Real Madrid muri iri rushanwa, anyura kuri Raul Gonzalez watsindiye iyi kipe ibitego 66, ariko nanone Benzema akaba ari inyuma ya Cristiano Ronaldo watsize ibitego 105.

Kylian Mbappe ku myaka 23 n’iminsi 79, igitego yatsinze cyamugize umukinnyi wa gatatu umaze gutsinda ibitego byinshi, ariko abitsindira hanze y’ikibuga cye aho amaze kugira ibitego 11, mu gihe babiri bamuri imbete ari Cristiano Ronaldo umaze gutsinda 20 ndetse na Lionel Messi umaze gutsinda ibitego 12.

Byari ibyishimo bikomeye kuri sitade ya Real Madrid
Byari ibyishimo bikomeye kuri sitade ya Real Madrid

Kugeza ubu amakipe ane (4) niyo amaze kubona itike yo gukina imikino ya 1/4 cy’irangiza, ariyo Bayern Munchen yo mu Budage, Liverpool yo mu Bwongereza, Manchester City yo mu Bwongereza na Real Madrid yo muri Espagne, mu gihe hategerejwe indi mikono ine izaba mu cyumweru gitaha, hagati ya tariki 15 na 16 Werurwe 2022.

kigalitoday android app mobile

Ibitekerezo   ( 1 )

nakundi nitahe mess mess messiya

habyarimana eric yanditse ku itariki ya: 11-03-2022  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka