Ni umukino uhuza amakipe y’ubukombe mu bihugu byayo ndetse no hanze yabyo, dore ko nk’uyu mwaka w’imikino mu gihugu cya Espagne, ikipe ya Real Madrid ariyo yatwaye shampiyona mu gihe ku rundi ruhande n’ubwo Liverpool itatwaye shampiyona y’u Bwongereza, yabayemo iya kabiri ariko yatwaye ibikombe bibiri mu gihugu imbere, FA Cup ndetse na League Cup.

Amateka y’iri rushanwa avuga iki hagati y’ibi bihanganye bibiri?

Liverpool na Real Madrid ni inshuro ya cyenda (9) zigiye guhurira muri UEFA Champions League, uretse imikino itatu ya mbere yabahuje hagati yia1981 na 2009, Liverpool yatsinze yose naho ubundi iyi kipe yo mu Bwongereza ntabwo yari yatsinda umukino n’umwe muri itanu (5) iheruka guhuramo na Real Madrid muri iri rushanwa, dore ko iyi kipe yo muri Espagne yatsinze imikino ine (4) bakanganya umwe (1).

Aya niyo makipe mu mateka ya Champions League amaze guhurira ku mukino wa nyuma inshuro nyinshi, umukino wo kuri uyu wa gatandatu bahuriraho uraba ari uwa gatatu dore ko bwa mbere bahuye tariki 27 Gicurasi 1981, Liverpool itwara igikombe itsinze igitego 1-0 mu gihe ubwa kabiri byari mu 2018 ikipe ya Real Madrid nayo itsinda Liverpool ibitego 3-1, igatwara igikombe cya UEFA Champions League uwo mwaka.

Vinicius Jr(uri imbere) ukina asatira na Casemiro(uri inyuma) ukina hagati mu kibuga ni bamwe mu bahanzwe amaso kuri uyu mukino

Ikipe ya Real Madrid ifite ibikombe bya Champions League 14 ari nayo ifite nyinshi, iyi kipe mu nshuro zirindwi (7) iheruka kugera ku mukino wa nyuma zose yatwaye igikombe, kuko bwa nyuma iheruka ntigitware hari mu 1981, Liverpool iyitsinda ikagitwara mu mukino nawo wari wabereye i Paris mu Bufaransa, kuva icyo gihe ntiratakaza umukino n’umwe iri ku wa nyuma.

Umutoza wa Liverpool, Jurgen Klopp, ikipe ya Real Madrid niyo amaze guhura nayo inshuro nyinshi muri Champions League, dore ko amaze gukina nayo imikino icyenda (9), muri iyi mikino haba ubwo yari arari muri Borussia Dortmund ndetse n’ubu atoza Liverpool ,yatsinzemo imikino itatu (3) atsindwa ine (4) mu gihe yanganyije imikino ibiri (2).

Urugendo rw’uyu mwaka kugera ku mukino wa nyuma rugaragaza iki?

Liverpool igeze ku mukino wa nyuma uyu mwaka ikinnye imikino 13 ya UEFA Champions League, uyu mwaka muri iyo mikino yatsinzemo icumi (10 inganya umwe (1) itsindwa umwe(1) mu gihe yatsinzemo ibitego 30 itsindwa 13, ku rundi ruhande Real Madrid nayo mu mikino 12 yakinnye yatsinzemo imikino umunani (8) itsindwa ine (4), ikaba nta mukino yigeze inganya n’umwe, muri iyi mikino Real Madrid yinjijemo ibitego 28 itsindwa 14.

Umunyezamuzu Alisson Becker na myugariro Virgil Vandijk bitezweho kurinda izamu rya Liverpool

Ni umukino urayoborwa n’umusifuzi w’Umufaransa, Clement Turpin, aho mu mikino itatu amaze gusifurira Liverpool yose iyi kipe yayitsinze, mu gihe umukino aheruka gusifurira Real Madrid wari umukino ubanza wa ¼ muri uyu mwaka, itsindira Chelsea mu Bwongereza ibitego 3-1.

MENYA UMWANDITSI

Jean Jules Uwimana

Umunyamakuru

@UwimanaJeanJul1

Reba inkuru zose nanditse ( 739 )