UEFA Champions League: Arsenal, Barcelona, Man City na Inter zabonye amanota atatu ya mbere

Yanditswe na

Jean Jules Uwimana

2-10-2024 - 05:45' | Ibitekerezo ( )

Mu ijoro ryo ku wa Kabiri tariki 01 Ukwakira 2024, hakinwe imikino itandatu y’umunsi wa kabiri wa UEFA Champions League aho Arsenal yatsinze Paris Saint-Germain (PSG) 2-0, FC Barcelona, Inter, Dortmund na Manchester City na zo zibona intsinzi.

Kai Havertz wa Arsenal yishimira igitego yatsinze Paris Saint-Germain

Ni imikino yabereye ku bibuga bitandukanye. Mu Bwongereza, Arsenal yari yakiriye PSG iyihatsindira ibitego 2-0 byatsinzwe na Kai Havertz ku munota 20 ku mupira wari uhinduwe na Leandro Trossard mu gihe ku munota wa 36 Bukayo Saka yatsinze igitego cya kabiri kuri kufura yatereye ku ruhande rw’iburyo ikijyana mu izamu. Aya yari amanota atatu ya mbere kuri Arsenal kuko mu mukino wa mbere yanganyije na Atalanta 0-0 mu gihe PSG yari yatsinze Girona 2-0.

Ikipe ya Man City ku munsi wa mbere yari yanganyirije na Inter mu rugo 0-0 ,kuri iyi nshuro yari yasuye ikipe ya Slovan Bratislva yo muri Slovakia. Iyi kipe yatsindiyeyo ibitego 4-0 byatsinzwe na Ilkay Gundogan ku munota wa munani, Phil Foden ku munota wa 15, Erling Haaland ku munota wa 58 ndetse na James McAtee ku wa 74, Man City yuzuza amanota ane mu mikino ibiri. Inter yari yakinnye na Man City yo kuri uyu wa Kabiri ytsindiye mu rugo Crvena Zvezda ibitego 4-0 byatsinzwe na Hakan Çlhanoglu, Marc Arnautovic, Lautaro Martinez na Mehdi Taremi.

Ikipe ya FC Barcelona yo muri Espagne yari yatsinzwe na AS Monaco ku munsi wa mbere ibitego 2-1, kuri iyi nshuro yari yakiriye Young Boys yo mu Busuwisi. Kuri iyi nshuro byayihiriye inatsinda ibitego byinshi 5-0 byatsinzwe na Robert Lewandowski ku munota wa 8 n’uwa 51, Raphinha ku munota wa 34, Inigo Martinez ku wa 37 ndetse n’icyitsinzwe na myugariro wa Young Boys witwa Mohamed Camara ku munota wa 81. Undi mukino ukomeye wabaye ni uwo Bayern Leverkusen yakiriyemo Milan AC yo mu Butaliyani maze iyi kipe yo mu Budage inabona amanota atatu ku nshuro ya kabiri itsinda igitego 1-0 cyatsinzwe n’Umunya-Nigeria Victor Boniface ku munota wa 51 atuma bagira amanota atandatu ku yandi.

Mu yindi mikino yakinwe, ikipe ya Borussia Dortmund yanyagiye Celtic ibitego 7-1 birimo bitatu byatsinzwe na Karim Adeyemi ku munota wa 11, 29 na 42 ibindi bitsindwa na Emri Can ku munota wa karindwi, Serge Guirassy ku munota wa 40 n’uwa 66 ndetse na Felix Nmecha ku munota wa 79. PSV yanganyije na Sporting igitego 1-1, RB Salzburg itsindwa na Brest yo mu Bufaransa ibitego 4-0 mu gihe Stuttgart yo mu Budage yanganyije na Sparta Praha 1-1.

Kugeza ubu ikipe ya Borussia Dortmund ni yo ya mbere n’amanota atandatu, izigamye ibitego icyenda, Brest na yo ifite atandatu n’ubwizigame bw’ibitego bitanu, mu gihe Bayern Leverkusen ari iya gatatu n’amanota atandatu na yo n’ibitego bitanu izigamye mu gihe indi mikino y’umunsi wa kabiri wa UEFA Champions League iteganyijwe kuri uyu wa Gatatu ndetse no ku wa Kane.