UEFA Champions League: Amakipe yo mu Bwongereza ku mukino wa nyuma

Ikipe ya Tottenham yo mu Bwongereza ibonye itike yo gukina umukino wa nyuma wa UEFA Champions League nyuma yo gusezerera ikipe ya Ajax Amsterdam yo mu Buholandi.

Umukino wo kwishyura wahuje ayo makipe yombi ku mugoroba wo ku wa gatatu tariki 08 Gicurasi 2019 urangiye Tottenham inganyije itsinze Ajax ibitego bitatu kuri bibiri (3-2) biyihesha amahirwe yo kuzakina umukino wa nyuma na Liverpool na yo yakatishije itike ku wa kabiri tariki 07 Gicurasi 2019 isezereye FC Barcelona yo muri Espagne.

Imikino ibanza ya kimwe cya kabiri yabaye mu cyumweru gishize yasize benshi baha amahirwe Ajax na FC Barcelone yo guhurira ku mukino wa nyuma, dore ko ayo makipe yombi yari yitwaye neza atsinda iyo mikino kandi bigaragara ko arusha ayo byari bihanganye.

Ibi byatumye benshi bafata ibyabaye nk’ibitangaza kuko ayo makipe yombi yamaze gusezererwa.

Kugeza ku munota wa nyuma w’inyongera icyizere cyari cyose ku ikipe ya Ajax yo kugera ku mukino wa nyuma.

Iminota 90 y’umukino yarangiye ari ibitego bitatu bya Ajax kuri bibiri bya Tottenham ku giteranyo cy’ibitego by’imikino yombi, hongerwaho iminota itanu.

Iyo minota na yo yarangiye abafana ba Ajax bose bahagurutse batangiye kwishimira intsinzi ariko ku munota wa gatandatu w’inyongera ibyishimo byabo byayoyotse nyuma y’uko umunya- Brésil Lucas Moura ukinira Tottenham atsindiye ikipe ye igitego cya gatatu muri uwo mukino.

Umunya- Brésil Lucas Moura azibukwa mu mateka ya Tottenham nyuma yo kuyifasha kugera ku mukino wa nyuma ayitsindiye ibitego bitatu wenyine
Umunya- Brésil Lucas Moura azibukwa mu mateka ya Tottenham nyuma yo kuyifasha kugera ku mukino wa nyuma ayitsindiye ibitego bitatu wenyine

Mu mukino ubanza wabereye mu Bwongereza tariki 30 Mata 2019, Ajax yatsinze Tottenham igitego kimwe ku busa (1-0), naho mu mukino wo kwishyura Tottenham yihimura kuri Ajax iyitsinda ibitego bitatu kuri bibiri (3-2).

Ibitego bitatu byose bya Tottenham byatsinzwe na Lucas Moura ku munota wa 55, yongeramo ikindi ku wa 59 w’umukino, ashyiramo icy’agashinguracumu ku munota wa gatandatu w’inyongera nyuma y’uko iminota 90 yari yarangiye.

Amakipe yombi yahise anganya ibitego bitatu ku bindi (3-3) ariko Tottenham iba ari yo ikomeza kuko yabashije gutsindira ibitego byinshi (bitatu) hanze, mu gihe Ajax yo yari yatsindiye mu Bwongereza igitego kimwe.

Ikipe ya Ajax Amsterdam yahabwaga amahirwe yo kugera ku mukino wa nyuma ibujijwe ayo mahirwe na Tottenham nyuma y’uko yari yasezereye ibihangange nka Real Madrid yo muri Esipanye muri 1/8 iyitsinze ibitego 5-3 mu mikino yombi.

Ajax muri kimwe cya kane yongeye gutungurana isezerera Juventus de Turin yo mu Butaliyani ikinamo Cristiano Ronaldo iyitsinze ibitego 3-2 mu mikino yombi.

Ni ubwa mbere mu mateka ikipe ya Tottenham igeze ku mukino wa nyuma wa UEFA Champions League. Ni mu gihe Liverpool yo imaze gutwara iki gikombe inshuro eshanu, ikaba iheruka kugitwara muri 2005.

Umukino wa nyuma uzahuza amakipe ya Tottenham na Liverpool yombi yo mu Bwongereza, uteganyijwe ku wa gatandatu tariki 01/06/2019 saa tatu z’umugoroba. Uwo mukino uzabera i Madrid muri Esipanye kuri stade Metropolitano isanzwe ikiniraho ikipe ya Atlético Madrid.

Wanda Metropolitano, Stade izakinirwaho umukino wa nyuma wa UEFA Champions League muri uyu mwaka wa 2019 ifite ubushobozi bwo kwakira abantu ibihumbi ‎68
Wanda Metropolitano, Stade izakinirwaho umukino wa nyuma wa UEFA Champions League muri uyu mwaka wa 2019 ifite ubushobozi bwo kwakira abantu ibihumbi ‎68

Ni ubwa kabiri mu mateka y’iri rushanwa amakipe yo mu Bwongereza agiye guhurira ku mukino wa nyuma. Undi mukino wahuje amakipe abiri yo mu Bwongereza wabaye muri 2008, ni ukuvuga mu myaka 11 ishize, ubera i Moscou mu Burusiya, uhuza Manchester United na Chelsea.

Icyo gihe iminota isanzwe y’umukino yarangiye amakipe yombi anganya 1-1, bitsinzwe na Cristiano Ronaldo ku ruhande rwa Manchester United, cyishyurwa na Frank Lampard wahoze akinira Chelsea. Nyuma y’iminota 120 hitabajwe penaliti, Manchester United yegukana intsinzi nyuma yo kwinjiza penaliti esheshatu kuri eshanu za Chelsea.

MENYA UMWANDITSI

PROMOTED STORIES
kigalitoday android app mobile

Ibitekerezo   ( 3 )

Ni Nzaramba viateur aliar kabarira.liver pool 2-1 totenham.

nzaramba viateur alias KABARIRA yanditse ku itariki ya: 12-05-2019  →  Musubize

Ndashaka amakuru agezweho

James yanditse ku itariki ya: 9-05-2019  →  Musubize

dukunda cyane amakuru meza y’imikino mutugezaho
liverpool izatsinda totthenahm
thanks

Jospa future yanditse ku itariki ya: 10-05-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka