#UCL: Real Madrid na Milan AC zakoze amateka zigera muri ½

Ikipe ya Real Madrid na Milan AC zageze muri ½ cya UEFA Champions League nyuma yo kwitwara neza mu mikino yo kwishyura ya ¼ yabaye kuwa 18 Mata 2023.

Real Madrid yageze kuri ibi nyuma yo gutsindira Chelsea iwayo ibitego 2-0 byatsinzwe na Rodrygo ku munota wa 58 nuwa 80. Iyi ntsinzi yasanze iyo mu mukino ubanza wabereye muri Espagne aho n’ubundi Real Madrid yatsinze Chelsea 2-0 maze iyisezerera ku giteranyo cy’ibitego 4-0 mu mikino ibiri.

Uburyo bukomeye bwa Chelsea umunyezamu Thibaut Courtois yakuyemo bwafashije Real Madrid kuguma mu mukino
Uburyo bukomeye bwa Chelsea umunyezamu Thibaut Courtois yakuyemo bwafashije Real Madrid kuguma mu mukino

Kugera mu mikino ya ½ byatumye Real Madrid ikora amateka akomeye kuko mu myaka 13 iheruka kuva 2010-2011 iyi kipe igeze muri iki cyiciro inshuro 11 uretse mu mwaka w’imikino wa 2018-2019 na 2019-2020 aho yasezerewe itarenze imikino ya 1/8 na Ajax ndetse na Manchester City. Iyi kipe muri ½ izakina n’ikipe irakomeza hagati ya Bayern Munich na Manchester City zikina kuri uyu wa Gatatu.

Umunya-Brazil Rodrygo yatsinze ibitego bibiri byasezereye Chelsea
Umunya-Brazil Rodrygo yatsinze ibitego bibiri byasezereye Chelsea

Mu Butaliyani habereye umukino wari ukomeye wahuje Milan AC na Napoli kugeza ubu iyoboye urutonde rwa shampiyona mu Butaliyani. Napoli yari iri mu rugo kuri Diego Armando Maradona Stadium yihariye umukino cyane ariko ku munota wa 43 ku kazi gakomeye kakozwe na Rafael Leao, yahaye umupira Olivier Giroud wari wahushije penaliti ku munota wa 22 gusa kuri iyi nshuro atsinda igitego amakipe ajya kuruhuka ari 1-0.

Umunyezamu Mike Maignan yakuyemo penaliti yafashije Milan AC
Umunyezamu Mike Maignan yakuyemo penaliti yafashije Milan AC

Mu gice cya kabiri Napoli yakomeje kotsa igitutu izamu rya Milan maze ku munota wa 82 ibona na penaliti yatewe na Khvicha Kvaratskhelia ariko umunyezamu Mike Maignan ayikuramo nkuko byagenze Alex Meret akuramo iya Milan mu gice cya mbere.

Mu minota y’inyongera Napoli yabonye igitego cyatsinzwe na Victor Osimhen ku mutwe ariko nticyagira icyo gifasha kuko umukino wahise urangira amakipe yombi anganyije 1-1 bisanga 1-0 Milan yari yatsinze mu mukino ubanza igera muri ½ itsinze 2-1 mu mikino ibiri.

Kugera muri ½ kuri Milan AC ni amateka akomeye kuko iyi kipe ifite iki gikombe inshuro zirindwi (7),mu myaka 16 ishize kuva 2007 aribwo yongeye kugera muri iki cyiciro dore ubwo ihaheruka mu mwaka w’imikino wa 2006-2007 aho yanatwaye igikombe.

Milan muri ½ izakina n’ikipe irakomeza hagati ya Inter nayo yo mu Butaliyani irakina na Benifica zikina umukino wo kwishyura wa ¼ kuri uyu wa gatatu aho imikino ya ½ ibanza iteganyijwe hagati ya tariki ya 9 niya 10 Gicurasi 2023.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka