Wari umunsi wa kabiri iri rushanwa rivuguruye rikinwa aho Manchester City mu rugo yari yakiriye Inter yo mu Butaliyani, bitunguranye amakipe yombi anganya 0-0. Mu minota 90 isanzwe ndetse n’ine yongereweho, Man City yagerageje amashoti 23 arimo atanu yajyaga mu izamu ariko atavuyemo igitego mu gihe Inter yateye amashoti 13 yarimo atatu agana mu izamu gusa buri kipe itahana inota rimwe.

Ikipe ya PSG mu rugo nayo yari yakiriye Girona yo mu gihugu cya Espagne, nubwo yayigoye gusa ku munota wa 90 w’umukino, Girona yitsinda igitego ku mupira woroshye wari uhinduwe na Nuno Mendez, maze umunyezamu wayo Paulo Gazzaniga ananirwa kuwufata umuca mu biganza ujya mu izamu, umukino urangira amanota atatu asigaye mu Bufaransa ku ntsinzi y’igitego 1-0.

Mu gihugu cy’u Bubiligi, Borussia Dortmund yahakuye amanota atatu itsinze Club Brugge ibitego 3-0, byatsinzwe na Jamie Gittens ku munota wa 76 n’uwa 86 mu gihe icya gatatu cyatsinzwe na Serhou Guirassy kuri penaliti yateye ku munota wa gatanu w’inyongera.

Mu y’indi mikino, Sparta Praha yatsinze RB Salzburg ibitego 3-0, Bologna inganya na Shaktar 0-0, mu gihe Celtic yatsinze inyagiye Slovan 5-1.

Imikino isoza umunsi wa mbere wa UEFA Champions League 2024-2025, irakinwa kuri uyu wa Kane, aho nka Arsenal yakirwa na Atalanta saa tatu z’ijoro (21h00), AS Monaco mu Bufaransa yakire FC Barcelona kuri iyo saha, Atletico Madrid yakire Leipzig, Brest na Sturm mu gihe saa kumi n’ebyiri na 45 Feyenoord iza kwakira Bayern Leverkusen naho Crvena Zvezda ikakira Benfica.