Mu kiganiro yagiranye na KT Sports kuri KT Radio yanyomoje amakuru abantu bakwirakwizaga bavuga ko yaba yarateye umugongo Rayon Sports agasinyira ikipe ya Flamengo ibarizwa mu mujyi avukamo wa Rio de Janeiro.

Yagize ati “Ndi hano ku bw’ibiruhuko , ku bijyanye n’ikipe ya Flamengo, Flamengo ni ikipe nakiniye nk’umukinnyi, natwaranye na yo ibikombe byinshi by’ingenzi. Flamengo ijya itegura umunsi mukuru igatumira abahoze bayikinira b’abanyabigwi, buri kwezi igakora isabukuru, urugero nkanjye isabukuru yanjye iba mu kwezi kwa gatandatu ni yo mpamvu bampaye ubutumire.

Yakomeje avuga ko yari yatumiwe mu muhango Flamengo igira wo kwizihiza isabukuru hamwe n’abahoze bayikinira ikabaha umwambaro mushya,umuhango uba buri kwezi.

Muri uyu muhango avuga ko yari kumwe n’abandi nka Junior na we wakinnye igikombe cy’isi. Roberto Carlos wamenyekanye mu ikipe ya Corinthians na yo yo mu mujyi wa Rio de Janeiro no mu ikipe y’igihugu ya Brazil kimwe na Real Madrid, n’abandi banyabigwi b’iyi kipe.

Robertinho avuga ko ahari mu biruhuko, agashimangira ko nta kipe y’iwabo baravugana ahubwo ko arimo kuruhuka n’umuryango we.

Yagize ati “Ndasuhuza buri wese, nkumbuye u Rwanda cyane, nkumbuye abakinnyi bacu. Nubaha cyane Rayon Sports n’abafana bayo kuko baranshimisha. Ndimo ndaruhukana n’umuryango wanjye mu biruhuko nta kindi uretse ibyo gusa.”

Robertinho yagiye mu biruhuko asize ahesheje igikombe cya shampiyona cya cyenda Rayon Sports .

Uyu mutoza, utarimo kugaragara mu mikino y’Igikombe cy’Amahoro na Rayon Sports, yagiye nta masezerano, kuko ayo yari afite yarangiranye n’intangiriro z’ukwezi kwa gatandatu.

Robertinho bivugwa ko azagaruka gutoza iyi kipe nibaramuka bumvikanye ku masezerano bivugwa ko yifuza ko bamwongeza umushahara ukava ku bihumbi bine by’amadolari y’abanyamerika ukagera ku bihumbi bitanu (ni ukuvuga ko ashaka kuva kuri miliyoni zibarirwa muri enye z’amafaranga y’u Rwanda yahembwaga akifuza ko yakwiyongera akajya ahembwa abarirwa muri miliyoni hafi eshanu z’amafaranga y’u Rwanda).

Robertinho yifuza ko kandi ubuyobozi bwa Rayon Sports bwaha amasezerano abungiriza be ari bo Wagner de Nascimento, Nkunzingoma Ramadhan na Mwiseneza Djamal bakora badafite amasezerano.

Flamengo ni imwe mu makipe akundwa cyane muri Brazil no mu Mujyi wa Rio de Janeiro. Robertinho ajya ayigereranya na Rayon Sports yo mu Rwanda.

Aya ni andi mafoto agaragaza Robertinho ari muri stade ya Maracana aho yari arimo kureba umukino w’igikombe cy’igihugu cya Brazil wahuzaga Flamengo na Corinthians. Uwo mukino warangiye Flamengo itsinze 1-0

Robertinho akiri umusore