Ni umuhango wabereye aho iki kibuga giherereye mu Kagari ka Nzove, ukaba witabiriwe na bamwe mu basanzwe bayobora umupira w’amaguru mu Rwanda, barimo Perezida wa FERWAFA, Nizeyimana Olivier, umuyobozi wa Skol, Ivan Wulffeert, ndetse na Rurangirwa Louis usanzwe uyoboye ikipe ya Rugende.

Nk’uko byakomojweho na Perezida wa Rayon Sports, Uwayezu Jean Fidele, yavuzeko Skol Stadium yuzuye itwaye asaga Miliyoni 500Frw, aho kuri ubu cyahinduwe gishya nyuma yo gushyirwamo ubwatsi bw’ubukorano, hakurwamo ubwatsi busanzwe bwari bukigize, ariko byagaragaye ko bwamaze gusaza ubu kikaba kiri ku rwego rw’ibishobora gukinirwaho imikino itandukanye kandi bitagoye abagikoresha.

Ni igikorwa SKOL yatekereje nyuma yo gusanga umufatanyabikorwa wayo, Rayon Sports agira ikibazo cyo gukora imyitozo mu bihe by’imvura, no kuba ikibuga cyangirika cyane buri uko gikoreshejwe kenshi.

Imirimo yo kubaka ikibuga yatangiye mu ntangiriro z’Ukwakira 2022, yakozwe na Sosiyete y’Abanya-Turikiya bagiye bubaka ibibuga bitandukanye by’amakipe y’iwabo nka Fenerbahçe S.K., Trabzonspor n’ibindi by’imyitozo y’amakipe yo mu cyiciro cya kabiri ndetse n’iby’indi mikino itandukanye, yubaka cyane ku mugabane wa Aziya.

Mu ikipe y’abagore ya Rayon Sports yamuritswe kuri uyu munsi ku mugaragaro, berekanye abakinnyi 23 muri 28 iyi kipe ifite, kuko abandi bari bagiye mu bizamini bisoza igihembwe cya mbere cy’amashuri.

Ikipe y’abagabo ya Rayon Sports izajya ikorera imyitozo kuri iki kibuga mu gihe iy’Abagore n’Ishuri ry’Umupira w’Amaguru rizashingwa muri uku kwezi k’Ukuboza uyu mwaka, bo bazajya bahakorera imyitozo banahakirire imikino y’amarushanwa n’iya gicuti.