Aho isi igeze ubu akenshi ikoranabuhanga riyoboye muri byose, imbuga nkoranymbaga nazo zikaza ku isonga mu guhanahana amakuru, zikaba na kimwe mu bihuriraho abantu benshi.

ZImwe mu mbuga nkoranyambaga zikoreshwa n’abantu benshi zibamo Facebook, Instagram ndetse na Twitter, aho usanga n’amakipe menshi ku isi yifashisha izo mbuga mu gutangaza amakuru.

Mu Rwanda, amakipe menshi usanga izo mbuga azikoresha, ariko amakipe yose ugasanga ntakoresha facebook, Instagram na Twitter icya rimwe, ari yo mpamvu ku rutonde twakoze twibanze ku rubuga rwa Twitter gusa, kuko ari rwo amakipe yose 16 akina mu cyiciro cya mbere akoresha.

Kuri Twitter, ikipe ya Rayon Sports ni yo ifite umubare munini w’abantu bayikurikira (Followers), iyi kipe kimwe n’andi menshi akaba yaragiye afungura imbuga za Twitter ariko ugasanga zimwe zirahagaze, ibi akenshi bigaterwa no guhindura abazikoresha cyangwa se hakabamo no kwibagirwa ijambo ry’ibanga rituma winjiramo.

Ikipe ya Heroes n’ubwo ari imwe mu makipe akoresha neza imbuga nkoranyambaga zayo zirimo Facebook, Instagram, Twitter, ndetse ikanasangiza amakuru yayo ku rubuga rwa Youtube, iyo urebye kuri Twitter usanga ari yo ifite abantu bake bayikurikira, n’ubwo ifite imbuga ebyiri yafunguye mu mwaka ushize zikigaragara zose kuri twitter.

Urutonde rw’uko amakipe arutana mu gukurikirwa ku mbuga nkoranyambaga

1. Rayon Sports 24,253

Ubusanzwe iyi kipe ni nayo isanzwe igira abafana benshi mu Rwanda, ikaba ku rubuga rwa Twiiter ikoresha kugeza ubu yararugiyeho muri Mata 2018, bivuze ko imaze imyaka ibiri gusa irukoresha n’ubwo hari izindi yagiye ifungura mbere ikaza kureka kuzikoresha, ubuikaba ifite abantu ibihumbi 24 na 253 bakurikira iyi kipe uri Twitter.

2. APR FC 9831

Ikipe ya APR FC, nayo hari izindi mbuga yagiye igira ariko zitagikora, ariko urwemewe kugeza ubu ikoresha yarugiyeho muri Werurwe 2018, ukwezi kumwe imbere ya Rayon Sports, ikaba ifite abantu 9831 bayikurikira kuri Twitter.

3. Mukura VS 8,022

IYi kipe yo mu karere ka Huye ni imwe mu makipe akoresha cyane imbugankoranyambaga, ikaba urukuta ikoresha yararufunguye mu Kuboza 2013, bikaba imyaka itanu mbere ya APR FC na Rayon Sports.

4. Gasogi United 6183

Ni ikipe iri gukina umwaka wayo wa mberemu cyiciro cya mbere, ariko ikaba iri mu makipe ikora ibijyanye n’igihe mu ikoranabuhanga, kugeza ubu ikaba ifite abantu 6183 bayikurikira kuri Twitter aho iza ku mwanya wa kane mu Rwanda.

5. Kiyovu Sports 4133

Iyi kipe nayo iri mu makipe afite abafana benshi, aho kugeza ubu imaze kugira abantu 4133 kuva mu kwakira 2018 ubwo yatangiraga gukoresha uru rubuga.

6. Musanze Fc 2812

Ikipe ya Musanze kugeza ubu iza ku mwanya wa gatandatu mu makipe akurikirwa n’abantu benshi, aho kugeza ubu ifite abantu 2812 bayikurikira, ikaba yaragiye kuri twitter mu kweiz kwa 06/2017, mbere ya APR FC na Rayon Sports.

7. Police Fc 1845

Iyi kipe ii ku mwanya wa karindwi, yafunguye urubuga ikoresha muri Gicurasi 2018, gusa ntiyakunze kurukoresha cyane, uyu mwaka w’imikino wa 2019/2020, ikaba ari bwo yashyize imbaraga mu gukoresha imbuga nkoranyambaga.

8. Bugesera FC 1,777

Iyi kipe yo mu karere ka Bugesera, mu mwaka ushize w’imikino ndetse n’intangiriro z’uyu yageragezaga gukoresha cyane urubuga rwayo rwa Twitter, ubu ikaba ifite abantu 1777 bayikurikirana, n’ubwo iheruka kugira amakuru irutangiraho mu mpera za 2019.

9. AS Muhanga 1492

Ikipe ya AS Muhanga ibarizwa mu karere ka Muhanga, iza ku mwanya wa cyenda n’abantu 1492, ikaba nayo yarageze kuri uru rubuga mu mwaka wa 2018.

10. Etincelles 1152

Etincelles nayo ni imwe mu makipe amaze imyaka myinshi mu Rwanda, yatangiye gukoresha Twiiter mu kwezi kwa 05/2019, ikaba imaze kugira abantu 1152 bayikurkira kugeza ubu.

11. ESPOIR FC 862

Espoir Fc yo mu karere ka Rusizi, nayo yatangiye gukoresha urubuga rwa Twitter mu kwezi wa 11/207, gusa ikaba itarabasha kuzuza abantu igihumbi aho kugeza ubu ifite abayikurikira 862.

12. Sunrise FC 801

Mu ntangiriro z’uyu mwaka w’imikino ni bwo uru rubuga rw’ikipe ya Sunrise rwatangiye kumenyekana, aho hari hatangiye uguhangana kw’amakipe kuri Twitter, gusa iyi kipe y’i Nyagatare ikurikirwa n’abantu 801 gusa.

13. AS Kigali 710

Iyi kipe ya AS Kigali bigaragara ko yagiye ifungura imbuga zitandukanye ariko zose ntizikomeze, kugeza ubu ifite imbuga ebyiri zikigaragara kuri Twitter, harimo rumwe rufite abantu 1408 rwatangiye gukora mu kwa 08/2019, ndetse n’urundi rufite 710 rwatangiye gukora mu kwa 11/2018 rukaba rwo rufite abantu 710 gusa, ariko rukaba ari rwo rumaze iminsi rutangaza amakuru y’ikipe.

14. Gicumbi FC 669

Urubuga rugaragara kuri twitter rukoreshwa n’iyi kipe rufite abantu 669 barukurikira, rugerageza gushyiraho amakuru y’iyi kipe, gusa muri ino minsi imikino yahagaze, rusangiza abarukurikira amakuru aba yashyizweho n’izindi mbuga (retweet) nk’urw’akarere ka Bugesera, aka Burera ndetse n’izindi.

15. Marines FC 73

Mu makipe amaze igihe mu cyiciro cya mbere, iyi kipe y’I Rubavu ni iyo ifite abantu bake baykurikira (73), n’ubwo yatangiye gukoresha uru rubuga kuva muri Nzeli 2018, gusa rukaba rugerageza gushyira amakuru atandukanye ku rubuga rwayo.

16. Heroes Fc 21

Iyi kipe ya Heroes nayo bigaragara ko kuri Twitter ihafite imbuga ebyiri kandi zose zashinzwe muri 2019 ndetse zose zagiye zigerageza gutanga amakuru muri uyu mwaka w’imikino ari nawo wa mbere mu cyiciro cya mbere, aho rumwe rukrikirwa n’abantu 201, urundi rugakurikirwa na 21, rukaba ari rwo kugeza ubu rugitanga amakuru y’iyi kipe.