Ikipe ya Police FC ni imwe mu makipe ari kugaragaza imbaraga nyinshi mu kwiyubaka ndetse no gutegura umwaka w’imikino wa 2020/2021, aho itangaza ko intego za mbere ari ukwegukana kimwe mu bikombe bikinirwa mu Rwanda birimo shampiyona cyangwa igikombe cy’Amahoro.

Kuri uyu munsi ikipe ya Police Fc yamaze gutangaza ko yasinyishije umunyezamu Kwizera Janvier wari usanzwe ari umunyezamu wa mbere w’ikipe ya Bugesera, aho yamusinyishije amasezerano y’imyaka ibiri.

Andi makuru atugeraho mu ikipe ya Police Fc, avuga yo iyi kipe yamaze kongerera amasezerano rutahizamu Iyabivuze Osee byigeze kuvugwa ko ashakwa na APR FC, mu gihe kandi abakinnyi Uwimbabazi Jean Paul na Usabimana Olivier nabo basinye andi masezerano y’imyaka ibiri.

Uyu munyezamu aje yiyongera ku bandi bakinnyi barimo Rutanga Eric wari kapiteni wa Rayon Sports, isinyisha kandi umukinnyi wo hagati Twizerimana Martin Fabrice wakiniraga Kiyovu Sports, ndetse na myugariro Iradukunda Eric Radu nawe wakiniraga Rayon Sports.