Yari imikino y’umunsi wa 38 wari uwa nyuma wa shampiyona y’icyiciro cya mbere mu Bwongereza yabaye kuri iki cyumweru aho byageze ku munsi wa nyuma hatari hamenyekana ikipe itwara igikombe cy’iyi shampiyona ifatwa nk’iya mbere ikomeye ku isi.

Ikipe ya Manchester City mu rugo kuri sitade ya Etihad yari yakiriye ikipe ya Aston Villa yari ku mwanya wa 14. Nyamara Aston Villa yatangiye itungurana ubwo myugariro Matty Cash yabanje kuyifasha gufungura amazamu ku munota wa 37 w’umukino ku mupira yahawe na myugariro Lucas Digne, igice cya mbere kirangira bayoboye n’igitego 1-0. Mu gice cya kabiri ikipe ya Aston Villa yakomeje umurongo wo gutsinda maze Philippe Coutinho ayitsindira igitego cya kabiri ku munota wa 69.

Kugeza ku munota wa 68 Manchester City yari ikiri inyuma yatsinzwe igitego 1-0 ariko kuri uwo munota umutoza wayo Pep Guardiola yasimbuje akuramo Bernardo Silva ashyiramo Ilkay Gundogan. Uyu mugabo ukomoka mu gihugu cy’u Budage nyuma y’’iminota umunani, yatsinze igitego cya mbere cya Manchester City ku kunota wa 76 maze nyuma y’iminota ibiri ku munota wa 78 Rodri Hernandez atsinda igitego cyo kunganya 2-2.

Kunganya kwa Manchester City mu gihe Liverpool yari gutsinda byari gutuma igikombe gitwarwa na Liverpool ariko ku munota wa 81 ku mupira yahawe na Kevin De Bryune, Ilkay Gundogan winjiye mu kibuga asimbura, yatsinze igitego cye cya kabiri mu mukino cyari icy’intsinzi kuri Manchester City yasoje umukino itsinze 3-2 biyihesha gusoza uyu mwaka w’imikino iyoboye itwaye shampiyona n’amanota 93. Ni mu gihe Liverpool yasoreje ku mwanya wa kabiri n’amanota 92. Liverpool yatsinze Wolverhampton Wanderers ibitego 3-1 birimo bibiri yatsinze mu minota 10 ya nyuma y’umukino.

Manchester City uyu mwaka w’imikino wa 2021-2022 itwaye igikombe mu mikino 38 yakinwe itsinzemo imikino 29 itsindwa imikino itatu (3) mu gihe yanganyije imikino itandatu (6) ikaba isoje izigamye ibitego 73.