Kiyovu Sports yatsinze AS Kigali inganya amanota na APR FC

Yanditswe na

Jean Jules Uwimana

15-04-2023 - 20:19' | Ibitekerezo ( 1 )

Ikipe ya Kiyovu Sports yatsinze AS Kigali 1-0 inganya amanota 53 na APR FC yanganyije na Gasogi United 0-0.

Shaban Hussein Tshabalala wa AS Kigali (ufite umupira) ahanganye na Fred Muhozi wa Kiyovu Sports (wambaye18)

Ni mu mikino ine y’umunsi wa 26 wa shampiyona yabaye kuri uyu wa Gatandatu, ibera ku bibuga bitatu bitandukanye. Mu Karere ka Muhanga, Kiyovu Sports ishaka gukomeza gusatira APR FC yakiriye AS Kigali maze birayihira kuko ibifashijwemo na Erissa Ssekisambu wayitsindiye igitego ku munota wa 67, umukino warangiye iwutsinze 1-0 bituma yicara ku mwanya wa kabiri n’amanota 53 aho izigamye ibitego 14.

Ku rundi ruhande, mu Karere ka Bugesera, APR FC iri ku mwanya wa mbere yari yakiriye Gasogi United. APR FC yasabwaga gutsinda kugira ngo ikomeze ishyiremo ikinyuranyo hagati yayo na Kiyovu Sports. Ibi ariko ntabwo ari ko byagenze kuko umukino warangiye amakipe yombi anganyije 0-0 bituma APR FC igumana umwanya wa mbere n’amanota 53 n’ibitego 22 izigamye.

Kuri iyi sitade ya Bugesera, saa saa sita n’igice hari habanje kubera umukino ikipe ya Gorilla FC yanyagiyemo Etincelles FC ibitego 4-1 biyifasha kugera ku mwanya wa munani aho ifite amanota 35. Rwamagana City yakiriye Musanze FC mu Karere ka Ngoma ariko ihatsindirwa ibitego 2-1 iguma ku mwanya wa 12 n’amanota 26, mu gihe Musanze FC yagumye ku mwanya wa 10 ariko amanota ava kuri 30 agera kuri 33.