Kiyovu Sports ishaka igikombe irongera itsinde Rayon Sports?

Rayon Sports irakira Kiyovu Sports mu mukino w’umunsi wa 22 wa shampiyona y’icyiciro cya mbere mu Rwanda ukaba umukino wo kwishyura hagati y’amakipe yombi. Ni nyuma y’uko Kiyovu Sports yatsinze Rayon Sports ibitego 2-0 mu mukino ubanza.

Kuva tariki ya 1 Mutarama 2010 kugeza tariki 5 Ukuboza 2021 ubwo Rayon Sports na Kiyovu Sports baheruka guhura, mu myaka 12 bamaze gukina imikino 24 muri shampiyona. Muri iyo mikino Kiyovu Sports yatsinzemo imikino irindwi(7) gusa maze Rayon Sports itsinda imikino 11 amakipe yombi anganya imikino itandatu(6).

Muri iyi mikino 24 hagati y’amakipe yombi kuva 2010 hatsinzwemo ibitego 65 bingana n’impuzandengo y’ibitego 2.70 ku mukino. Muri ibi bitego Rayon Sports ni yo ifitemo ibitego byinshi kuko yinjije mu izamu rya Kiyovu Sports ibitego 37 mu gihe yo yinjije mu izamu rya Rayon Sports 28.

Kuva Tariki 10 Mutarama 2010 kugeza tariki 21 Mata 2012 Rayon Sports yamaze imyaka ibiri yose itazi uko gutsinda Kiyovu Sports bimera kuko muri icyo gihe bahuyemo imikino itandatu(6) Kiyovu Sports igatsindamo ine(4) irimo n’itatu yatsinze yikurikiranya mu gihe banganyijemo imikino ibiri.

Rayon Sports ariko yaje kwihimura kuri Kiyovu Sports kuko kuva tariki 3 Ugushyingo 2012 kugeza tariki 22 Mata 2018 yamaze imyaka itandatu bakinnyemo imikino 12 Kiyovu Sports idatsinda Rayon Sports kuko Murera muri iyo mikino yatsinzemo icyenda(9) bakanganyamo imikino itatu gusa. Kuva 2010 kugeza ubu Rayon Sports ni yo ifite agahigo ko gutsinda imikino myinshi yikurikiranya ihuza amakipe yombi dore ko hagati ya tariki 22 Werurwe 2015 kugeza 15 Ukwakira 2017 bahuyemo imikino itandatu yose Rayon Sports iyitsinda.

Rayon Sports irakina uyu mukino imaze imikino itatu yikurikiranya itabona intsinzi muri shampiyona kuko mu mikino itandatu iyi kipe imaze gukina mu gice cyo kwishyura cya shampiyona imaze gutsindamo imikino ibiri (2) igatsinda umwe (1) mu gihe imaze kunganya imikino itatu(3) yose iheruka gukina.

Kiyovu Sports iri guhatanira igikombe cya shampiyona uyu mwaka nyuma y’imyaka 30 iri kwitwara neza kurusha mukeba bagiye guhura. Iyi kipe kugeza ubu mu mikino itandatu yose iheruka gukina kuva hatangira igice cya kabiri cya shampiyona iyi kipe nta kosa na rimwe yari yakora kuko muri iyo mikino yose yayitsinze.

Kiyovu Sports imikino itandatu iheruka gukina yinjijemo ibitego 13 mu gihe yo yinjijwemo ibitego bibiri(2). Ku rundi ruhande Rayon Sports mu mikino itandatu imaze gukina mu mikino yo kwishyura yinjijemo ibitego bine(4) yinjizwa bibiri(2).

Mu mikino 21 ya shampiyona imaze gukinwa muri rusange, Rayon Sports imaze kurangiza imikino 10 yonyine nibura itinjijwe igitego mu izamu ryayo. Muri iyo yarangije imikino itsinze irindwi (7) mu gihe yanganyijemo imikino itatu (3) byumvikana ko imikino 11 yose Rayon Sports yagiye iyirangiza mu izamu ryayo hinjiyemo igitego iyo yabaga yinjijwe igitego. Yatsinze imikino ibiri gusa(2) inganya imikino itanu(5) byumvikana ko yatsinzwe imikino ine (4) ari na yo imaze gutsindwa muri rusange.

Kiyovu Sports mu mikino 21 ya shamiyona imaze gukinwa imaze kurangiza imikino 12 nta gitego yinjijwe mu izamu ryayo aho muri iyo yatsinzemo imikino icumi (10) ikanganyamo ibiri (2). Ibi bivuze ko indi mikino icyenda (9) yose Kiyovu Sports yagiye isoza umukino nibura yinjijwe igitego mu izamu ryaryo aho muri iyo mikino igihe Kiyovu Sports yabaga yinjijwe igitego yatsinze imikino ine(4) inganya itatu(3) byumvikana ko yatsinze ibiri(2).

Kiyovu Sports gutsinda imikino itandatu(6) yose yikurikiranya ni byo bihe byiza imaze kugira muri shampiyona y’uyu mwaka kugeza ubu. Ni mu gihe Rayon Sports ibihe byiza yagize ari ugutsinda imikino ibiri(2) yikurikiranya, ibintu imaze gukora inshuro ebyiri.

Rayon Sports kunganya imikino itatu(3) yikurikiranya ari na yo iheruka gukina, ni wo musaruro mubi imaze kugira muri iyi shampiyona aho igeze, mu gihe ku rundi ruhande Kiyovu Sports umusaruro mubi imaze kugira kugeza ubu muri shampiyona na yo ari ukumara imikino itatu yikurikiranya inganya hagati y’umunsi wa 11 n’uwa 13 wa shampiyona.

Imyitwarire mu kibuga igaragaza ko Kiyovu Sports itari yarangiza umukino na rimwe ituzuye yabonye ikarita y’umutuku. Ni mu gihe Rayon Sports yo imaze kubona ikarita imwe y’umutuku yahawe Nizigiyimana Karim bakina na Etincelles.

Kiyovu Sports iyoboye urutonde rwa shampiyona n’amanota 47 mu gihe Rayon Sports iri ku mwanya wa gatanu n’amanota 35.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka