Ni umukino ugiye guhuza amakipe yombi mu gihe akurikirana ku rutonde rwa shampiyona, aho APR FC iri ku mwanya wa mbere n’amanota 60, Kiyovu Sports ikaba ku mwanya wa kabiri n’amanota 57.

Igihe cyashize cyerekana iki ku makipe yombi?

Kuva mu 2016 APR FC na Kiyovu Sports ni amakipe amaze guhurira mu kibuga inshuro 15 muri rusange, ikipe ya APR FC niyo ifite umusaruro mwiza muri iyo mikino iheruka kuko yatsinzemo imikino umunani (8), Kiyovu Sports itsinda umwe (1) amakipe yombi anganya imikino itandatu (6).

Muri iyi mikino 15 kuva mu 2016, habonetsemo ibitego 13 ku mpande zombi aho APR FC ariyo ifitemo byinshi kuko yatsinze 12 mu gihe Kiyovu Sports yatsinze igitego kimwe (1), iheruka kwinjiza mu izamu rya APR FC ubwo yanayitsindaga 1-0 tariki 27 Ukwakira 2017.

Kuva mu myaka itandatu (6) ishize mu mikino 15 yahuje APR FC na Kiyovu Sports, harimo umwihariko w’uko ikipe itsinze, itsinda indi kuri zeru (0) bivuze ko uwatsinze undi atamwinjizaga igitego, nko mu mikino umunani (8) APR FC yatsinze yose yayitsindaga Kiyovu Sports itinjije igitego.

Umukino uheruka guhuza APR FC na Kiyovu Sports amakipe yombi yanganyije 0-0, kuva mu 2016 mu mikino 15 yahuje amakipe yombi, imikino itandatu (6) banganyije yose byari 0-0.

Ikipe ya APR FC mu mikino itanu iheruka gukina muri shampiyona uyu mwaka, yose yarayitsinze yinjizamo ibitego icyenda (9), yinjizwa bitatu (3).

Ku rundi ruhande Kiyovu Sports mu mikino itanu iheruka gukina muri shampiyona, yatsinzemo itatu (3) inganya umwe (1) itsindwa umwe (1), muri iyo mikino yatsinzemo ibitego birindwi (7) yinjizwa bibiri (2).

Ni umukino kuwureba bisaba kwishyura 5000Frw ahasanzwe, 10000Frw ahatwikiriye, 20000Frw muri VIP ndetse na 30000 muri VVIP.