Urukundo rw’abafana, imikinire y’ikipe, ibikombe ndetse no gukomera kw’ikipe ni bimwe mu bituma abakinnyi baramba mu makipe.

Mu Rwanda, usanga abakinnyi basinya amasezerano y’ imyaka ibiri igenda yongerwa uko ikipe n’umukinnyi babyumvikanye. Kigali Today yabateguriye abakinnyi bamaze imyaka irenze itanu mu makipe bakinira mu mupira w’amaguru.

Abamaze imyaka umunani

Irambona Eric muri Rayon Sports

Irambona Eric bita umwana w’ikipe, yinjiye muri Rayon Sports nkuru mu mwaka wa 2012 aho yari avuye mu kipe y’abato ya Rayon Sports yabaga i Nyanza.

Buteera Andrew muri APR FC

Buteera Andrew yinjiye muri APR FC mu mwaka wa 2012 avuye mu Ikipe y’Igihugu y’abatarengeje imyaka 17 yakinnye igikombe cy’Isi cy’abatarengeje iyo myaka, cyabereye muri Mexique. Nubwo yakunze kurangwa n’imvune igihe kinini ariko ubuhanga bwe mu kibuga ntawe ubushidikanyaho. Na we amaze imyaka umunani muri APR FC.

Abamaze imyaka irindwi

Bishira Lattif na Bate Shamiru Robert muri As Kigali

Myugariro wo hagati muri AS Kigali, Bishira Lattif yageze muri iyi kipe y’Umujyi wa Kigali mu mwaka wa 2013, aho yari avuye mu ishuri ryigishaga umupira w’amaguru Isonga FC. Kuva muri uwo mwaka kugeza uyu munsi ni umukinnyi ngenderwaho mu bwugarizi bwa AS Kigali.

Bate Shamiru Robert ni umunyezamu wa AS Kigali kuva mu mwaka wa 2013. Yageze muri iyi kipe azanywe n’umutoza Cassa Mbungo Andre aho yari amuvanye muri Espoir FC y’i Rusizi.

Mushimiyimana Regis muri Sunrise FC

Myugariro wo hagati Mushimiyimana Regis ukinira Sunrise FC, ni umwe mu bakinnyi bamaze igihe kitari gito mu ikipe imwe, aho yatangiye gukinira Sunrise mu mwaka wa 2013, igikinira i Rwamagana, ikina icyiciro cya kabiri. Uyu musore ari mu bakinnyi bafashije iyi kipe kuzamuka mu cyiciro cya mbere mu mwaka wa 2014.

Rucogoza Djihad muri Bugesera FC

Kapiteni wungirije akaba n’umukinnyi ukina hagati muri Bugesera FC, Rucogoza Djihad, ari mu bakinnyi bamaze igihe kinini muri Bugesera FC. Uyu musore yatangiye gukina umupira w’amaguru muri iyi kipe mu mwaka wa 2014, aho yakinnye imyaka ibiri mu cyiciro cya kabiri. Mu mwaka we wa kabiri muri iyi kipe, ari mu bakinnyi bafashije Bugesera FC kuzamuka mu cyiciro cya mbere mu mwaka wa 2016. Kugeza n’ubu aracyayikinira.

Abakinnyi bamaze imyaka itandatu

Mpozembizi Mohammed na Ngendahimana Eric muri Police FC

Myugariro ukina ku ruhande rw’iburyo, Mpozembizi Mohammed ari mu bakinnyi bamaze igihe kinini muri Police FC, aho ayimazemo imyaka itandatu. Mpoze, nkuko bamwita, yageze muri Police FC avuye muri Musanze FC ahagana mu mwaka wa 2014.

Ngendahimana Eric, na we ni umwe mu bakinnyi bamaze imyaka itandatu muri Police FC, dore ko yayigezemo mu mwaka wa 2014 avuye muri Musanze FC. Ngendahimana yabaye umukinnyi ngenderwaho muri Police FC mu kibuga hagati, ndetse akaba n’umwe muri ba Kapiteni ba Police FC.

Itangishatse Jean Paul muri Sunrise FC

Umunyezamu Itangishatse Jean Paul ufatira Sunrise FC, ni umwe mu bakinnyi bamaze igihe bakinira iyi kipe yo mu Burasirazuba aho yayigezemo mu mwaka wa 2014 avuye muri Rwamagana City.

Kwizera Janvier muri Bugesera FC

Umunyezamu Kwizera Janvier bita Rihungu, yageze muri Bugesera FC mu kwezi kwa Kamena mu mwaka wa 2014. Uyu musore yafatanyije na bagenzi be kuzamura iyi kipe mu cyiciro cya mbere mu mwaka wa 2016.

Abakinnyi bamaze imyaka itanu

Songa Isaie na Muvandimwe Jean Marie Vianney, muri Police FC

Rutahizamu Songa Isaie ari mu bakinnyi bamaze imyaka itari mike mu ikipe ya Police FC, aho yageze muri iyi kipe mu mwaka wa 2015 avuye muri AS Kigali.

Myugariro ukina ku ruhande rw’inyuma aho bita kuri gatatu, Muvandimwe JMV, yinjiye muri Police FC mu mwaka wa 2015 avuye muri Gicumbi FC. Uyu musore yigaragaje ku mwanya anahamagarwa mu Ikipe y’Igihugu Amavubi.

Nsabimana Eric Zidane wa As Kigali

Uyu musore ukina hagati mu kibuga, yageze muri AS Kigali avuye muri APR FC mu mwaka wa 2015. Ni umwe mu bakinnyi bagendeweho muri AS Kigali mu mya itanu ayimazemo.