Umukino wo kwishyura wabereye kuri sitade ya Kigali i Nyamirambo. Ikipe ya Police FC yari yakiriye AS Kigali amakipe yombi anganya ibitego 2-2. Muri uyu mukino ikipe ya Police FC ni yo yafunguye amazamu ku munota wa 6 ku gitego cyatsinzwe na Ndayishimiye Antoine Dominique ariko cyishyurwa na AS Kigali gitsinzwe na Aboubakar Lawal ku munota wa 37.

Police FC yakomeje gushaka igitego cya kabiri biyihira ku munota wa 58 ubwo Ndayishimiye Antoine Dominique yongeraga kuyibonera igitego cya kabiri biyihesha kuyobora umukino ifite ibitego 2-1. Ibi byabaye kugeza ubwo ku munota wa 89 kurinda ibyo yari yagezeho byanze maze Shaban Hussein Tshabalala wanatsinze igitego kimwe rukumbi AS Kigali yari yatsinze Police mu mukino ubanza arongera afasha AS Kigali kwishyura igitego cya kabiri anayifasha gusezerera Police FC ku bitego 3-2 mu mikino ibiri.

Ikipe ya Police FC yatwaye Igikombe cy’Amahoro inshuro imwe mu 2012 umukino w’uyu munsi yawusoje ari abakinnyi 10 nyuma y’uko Nsabimana Eric wakinaga n’ikipe amaze umwaka umwe avuyemo yahawe ikarita y’umutuku ku munota wa 90.

AS Kigali ni inshuro ya gatatu igeze ku mukino wa nyuma w’Igikombe cy’Amahoro aho inshuro ebyiri(2) iheruka kuhagera zose yatwaye igikombe. Yabikoze bwa mbere mu mwaka wa 2013 itsinze AS Muhanga ibitego 3-0 itwara igikombe cya mbere mu gihe n’igiheruka gukinirwa muri 2019 na cyo yagitwaye itsinze Kiyovu Sports ibitego 2-1.

Umukino wa nyuma w’Igikombe cy’Amahoro cy’uyu mwaka wa 2022 AS Kigali izawuhuriraho n’ikipe izakomeza hagati ya APR FC yakira Rayon Sports kuri uyu wa Kane tariki 19 Gicurasi 2022. Ni umukino wo kwishyura ubera kuri sitade ya Kigali i Nyamirambo, mu gihe mu mukino ubanza amakipe yombi yanganyije 0-0.