Simba Honore yahagaritswe amezi atatu

Mu kiganiro Umunyabanga w’umusigire muri FERWAFA, David Iraguha yagiranye na Kigali Today, yavuze ko batazigera bihanganira abasifuzi bazakomeza kugaragaraho amakosa bakosa.

Yagize ati “Nta munsi n’umwe tuzigera twihanganira amakosa nk’ayo ari na yo mpamvu dukomeza kubikurikirana, uretse guhagarikwa hari n’ibindi bizaza nyuma kugira ngo tumenye impamvu cyangwa ikibyihishe inyuma kuko urebye nk’ibyabereye i Rubavu honyine, n’umwana wavutse hari ibyo ahita abona. Nidushaka tuzasigarane abasifuzi 10 basifura neza kurusha kugira 100 babikora nabi”.

Yakomeje agira ati “Ubu byose tugiye kubihagurukira kuko tumaze kubona ko harimo ibibazo, hagiye kuzamo n’izindi nzego abazafatwa bazaba intangarugero kandi mpamya ko benshi bazikosora”.

Abasifuzi bane komisiyo y’imisifurire yateranye kuri uyu wa Mbere tariki 13 Ukuboza 2021 yahagaritse ni aba bakurikira:

1. Gakire Patrick

Komisiyo y’imisifurire yafashe umwanzuro wo guhagarika Gakire Patrick wari umusifuzi wo ku ruhande ku mukino wahuje Marine FC na Mukura VS tariki ya 8 Ukuboza 2021 kuri sitade Umuganda, wavuzweho kwanga igitego cya Mukura, yahagaritswe ibyumweru cumi 12 by’imikino adasifura uhereye tariki 13 Ukuboza 2021.

2. Simba Honore

Komisiyo y’imisifurire yafashe umwanzuro wo guhagarika Simba Honore wari umusifuzi wo ku ruhande ku mukino wahuje ikipe ya Musanze FC na Police FC tariki ya 10 Ukuboza 2021 kuri sitade Ubworoherane, uvugwaho kwanga igitego cya Police FC cyari gitsinzwe na Hakizimana Muhadjili, avuga ko yaraririye bityo komisiyo imuhanisha kumara ibyumweru 12 by’imikino adasifura uhereye tariki 13 Ukuboza 2021.

3. Kwizera Fils

Komisiyo y’imisifurire yafashe umwanzuro wo guhagarika umusifuzi kwizera Fils wari wasifuye umukino w’icyiciro cya kabiri wahuje ikipe ya Intare FC na The Winners tariki ya 12 Ukuboza 2021 kuri sitade ya Kicukiro, kubera ikosa yakoze bityo ahanishwa kumara ibyumweru 16 by’imikino adasifura uhereye tariki 13 ukuboza 2021.

4. Ugirashebuja Ibrahim

Komisiyo y’imisifurire yafashe umwanzuro wo guhagarika Ugirashebuja Ibrahim wari umusifuzi wo hagati ku mukino wahuje ikipe ya Etincelles FC na AS Kigali, uvugwaho kongera iminota 10 ku minota isanzwe y’umukino ndetse igitego cya AS Kigali cyishyuraga icya Etincelles kigatsindwa na yo yarenze, bityo komisiyo y’imisifurire yamuhagaritse ibyumweru 16 by’imikino adasifura uhereye tariki 13 ukuboza 2021.

Aba bahagaritswe baje bakurikira abasifuzi barindwi bari bahagaritswe tariki 30 Ugushyingo 2021. Kugeza ubu muri rusange hamaze guhagarikwa abasifuzi 11, muri bo harimo umunani basifuye imikino yo mu cyiciro cya mbere yagiye ivugwaho ko yabayemo amakosa atandukanye, mu gihe umwe yasifuye umukino w’icyiciro cya kabiri ndetse na babiri basifuye imikino y’abari n’abategarugori.

MENYA UMWANDITSI

Jean Jules Uwimana

Umunyamakuru

@UwimanaJeanJul1

Reba inkuru zose nanditse ( 739 )