Ibi aya makipe yabigezeho nyuma y’imikino y’umunsi wa gatandatu w’irushanwa rito ryakinwe n’amakipe ane yari yageze muri kimwe cya kabiri cy’irangiza aho buri kipe yahuye n’indi. Ikipe y’Amagaju FC yasabwaga gutsinda umukino wayo byanze bikunze, yari yakiriye Etoile de l’Est FC yo itasabwaga byinshi kuko yagiye gukina ifite amanota 10 n’ibitego bine yari izigamye.

Amagaju FC yakoze ibyo yasabwaga, itsinda Etoile de l’Est igitego 1-0. Gutsinda uyu mukino wayo byayifashije kugira amanota 10 nta mwenda nta n’igitego izigamye mu gihe Etoile de l’Est yo yari igumanye amanota 10 n’ibitego bitatu izigamye.

Ku rundi ruhande ariko nubwo Amagaju FC yatsindaga, yanakurikiraniraga hafi ibiri kubera kuri stade ya Mumena i Kigali aho ikipe ya Gicumbi FC bari bahanganiye umwanya wa kabiri yari yakiriwe na Vision FC itari ifite icyo irwanira kuko yari iya nyuma. Gicumbi FC yasabwaga gutsinda ariko igategereza ibyari kuva mu mukino w’Amagaju FC wari uri kubera i Nyamagabe ntabwo byayishobokeye kuko yanganyije na Vision FC igitego 1-1.

Iyi mikino yasozaga shampiyona y’icyiciro cya kabiri 2022-2023 yasize Etoile de l’Est iyoboye urutonde rw’amanota 10 izigamye ibitego bitatu byatumye izamuka mu cyiciro cya mbere inatwaye igikombe, mu gihe yazamukanye n’Amagaju FC yasoreje ku mwanya wa kabiri n’amanota 10, naho Gicumbi FC isoreza ku mwanya wa gatatu n’amanota 8 mu gihe Vision FC yasoje iri ku mwanya wa nyuma n’amanota ane.

Etoile de l’Est FC yamanutse mu cyiciro cya kabiri mu mwaka w’imikino wa 2021-2022 mu gihe Amagaju FC yari yaramanutse mu mwaka w’imikino wa 2018-2019.