#COVID19: Ronaldo na bagenzi be bo muri Juventus bazamara amezi ane badahembwa nk’ibisanzwe

Abakinnyi bakinira ikipe ya Juventus na Maurizio Sarri usanzwe utoza iyi kipe bemeye kumara amezi ane badahembwa kugira ngo ikipe itazahura n’ihungabana ry’ubukungu nyuma y’icyorezo cya COVID-19.

Icyorezo cya Coronavirus cyagize ingaruka ku bintu bitandukanye harimo na siporo (ifoto: Goal.com)
Icyorezo cya Coronavirus cyagize ingaruka ku bintu bitandukanye harimo na siporo (ifoto: Goal.com)

Rutahizamu Cristiano Ronaldo na bagenzi be, bemeye ko bazatahembwa umushahara wabo wose muri Werurwe, Mata, Gicurasi na Kamena kugira ngo bafashe ikipe yabo kwirinda ihungabana ry’ubukungu ryaterwa na Coronavirus.

Mu gihe umupira w’amaguru wakongera gusubukurwa muri iki gihugu cyugarijwe na Coronavirus kurusha ibindi mu Burayi, Juventus izongera gusuzuma icyemezo cyafashwe n’abakinnyi.

Mu itangazo ubuyobozi bw’ikipe bwashyize ahagaragara, bwagize buti “Juventus irashimira abakinnyi n’umutoza ku bw’ubwitange bagize mu gihe kitoroshye kuri buri wese."

Andi makipe y’i Burayi, abakinnyi bayo bemeye kugabanyirizwa umushahara ni Bayern Munich na Borussia Dortmund yombi yo mu Budage.

Muri Bayern Munich abakinnyi bazakatwa 20% mu gihe muri Borussia Dortmund bazakatwa 50%.

Andi makipe akinoza uyu mushinga harimo FC Barcelona yo yifuza gukata 70% by’imishahara y’abakinnyi nubwo abakinnyi bayo batabikozwa.

Icyorezo cya CoronaVirus uretse guhungabanya ubukungu bw’iyi kipe cyanibasiye bamwe mu bakinnyi bayo nka : Blaise Matuidi, Paulo Dybala na Daniele Ruganni basanzwemo iyi ndwara.

Imikino yose yo mu Butaliyani yahagaritswe tariki ya 3 Werurwe 2020 kubera icyorezo cya COVID-19 cyibasiye Isi. Iki gihe gishobora kwiyongera kubera ko iki gihugu gikomeje kuzahazwa n’iki cyorezo mu buryo bukomeye.

Kudahemba nk’uko bisanzwe abakinnnyi mu gihe cy’amezi ane (4) muri ibi bihe by’icyorezo cya Coronavirus bizafasha iyi kipe kubika agera kuri miliyoni z’Amayero (90€), ni ukuvuga asaga miliyari 94 na miliyoni 200 uyabaze mu mafaranga y’u Rwanda.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka