Abakinnyi ba Liverpool bishimira igitego cya gatatu batsinze FC Barcelone

Liverpool ibigezeho nyuma yo gutsinda FC Barcelone ibitego bine ku busa (4-0) mu mukino wo kwishyura wabereye i Anfield ku kibuga cya Liverpool ku mugoroba wo kuri uyu wa kabiri tariki 07 Gicurasi 2019.

Mu mukino ubanza wabaye tariki 01 Gicurasi 2019, ikipe ya FC Barcelone ku kibuga cyayo (Camp Nou) yari yatsinze Liverpool ibitego bitatu ku busa (3-0), ibitego byafatwaga nk’impamba itari nto, biyiha icyizere cyo kuzasezerera Liverpool mu buryo bworoshye.

Icyakora mu mukino wo kwishyura, Liverpool yakinnye idafite bamwe muri ba rutahizamu bayo igenderaho ari bo Mohamed Salah na Roberto Firmino bafite ibibazo by’imvune, yakoze ibyo bamwe batekerezaga ko bidashoboka, isezerera FC Barcelone ku giteranyo cy’ibitego bine kuri bitatu (4-3) mu mikino yombi, ubanza n’uwo kwishyura.

Ikipe ya Liverpool yamaze kubona itike yo kwerekeza ku mukino wa nyuma iramenya iyo bizahura ku mukino wa nyuma hagati ya Ajax Amsterdam yo mu Buholandi na Tottenham yo mu Bwongereza nyuma y’umukino wo kwishyura uhuza ayo makipe yombi kuri uyu wa gatatu tariki 08 Gicurasi 2019.

Umukino wo kwishyura urabera mu Buholandi mu gihe umukino ubanza wabereye mu Bwongereza mu cyumweru gishize, urangira Ajax itsinze Tottenham igitego kimwe ku busa (1-0).

Umukino wa nyuma uteganyijwe kuba ku wa gatandatu tariki 01 Kamena 2019 ni ukuvuga mu byumweru bitatu biri imbere i Madrid muri Espagne ku kibuga Wanda Metropolitano gisanzwe gikiniraho ikipe ya Atlético Madrid.

Mohamed Salah (utakinnye kubera imvune) yari yaje ku kibuga yambaye umupira uriho amagambo atera bagenzi be akanyabugabo, aho yabasabaga kudacika intege

Nyuma y’umukino, abakinnyi ba Liverpool baririmbanye n’abafana indirimbo ‘You Will Never Walk Alone’ (Ntuzigera ugenda wenyine)

MENYA UMWANDITSI

Malachie Hakizimana

Umunyamakuru

@ h_malachie

Reba inkuru zose nanditse ( 1526 )