Cameroun na Cap Vert zabonye intsinzi ku munsi wa mbere wa #AFCON2021 (AMAFOTO)

Yanditswe na

Sammy Imanishimwe

9-01-2022 - 23:41' | Ibitekerezo ( )

Ku munsi wa mbere w’igikombe cya Afurika kiri kubera muri Cameroun, ikipe ya Cameroun na Cap-Vert zabonye amanota atatu nyuma yo gutsinda imikino yayo

Kuri iki Cyumweru muri Cameroun ni bwo hatangiye igikombe cya Afurika cya 2021 kiri guhuza ibihugu 24, igikombe cyatangijwe n’ibirori byanakurikiranwe n’abayobozi barimo Perezida wa Cameroun Paul Biya, Perezida wa FIFA ndetse na Perezida wa CAF.

Ibirori byo gutangiza irushanwa byari binogeye ijisho

Umukino wafunguye irushanwa wahuje ikipe ya Cameroun yari imbere y’abafana bayo, ndetse na Burkina Faso, umukino warangiye Cameroun itsinze ibitego 2-1.

Ikipe ya Burkina Faso ni yo yafunguye amazamu ku munota wa 24 w’umukino ku gitego cyatsinzwe na Gustavo Sangare, Cameroun iza kwishyura kuri Penaliti yatsinzwe na Vincent Aboubakar ku munota wa 40, atsinda n’icya kabiri nacyo cya penaliti ku munota wa gatatu w’inyongera y’igice cya mbere.

Vincent Aboubakar watsinze ibitego bibiri bya Cameroun

Undi mukino wo muri iri tsinda watangiye i Saa tatu zuzuye, warangiye Cap Vert itsinze Ethiopia igitego 1-0, cyatsinzwe na Julio Tavares ku munota wa 45 n’umutwe, ku mupira yari ahawe na Garry Rodrigues.