Amakuru yizewe agera kuri Kigali Today ahamya ko ubwumvikane hagati ya Tuyisenge Arsene ukina imbere ku ruhande rw’iburyo warangije umwaka w’imikino 2023-2024 ari kwitarana neza na APR FC bwagezweho hagati y’impande zombi ku wa Mbere w’iki Cyumweru tariki 10 Kamena 2024.

Kuri uwo munsi Tuyisenge Arsene nk’uko abamubonye babihamirije Kigali Today ngo yageze ku biro by’ikipe ya APR FC ku Kimihurura mu karere ka Gasabo mu masaha ya nyuma ya Saa Sita, maze ahasohoka yemeranyije n’iyi kipe ibitse ibikombe 22 bya shampiyona ko azambara umwambaro wayo w’umweru n’umukara mu gihe kingana n’imyaka ibiri.

Arsene Tuyisenge wakiniraga Rayon Sports yumvikanye na APR FC

Mu bihe bitandukanye yagiye ahamagarwa mu ikipe y’igihugu y’u Rwanda Amavubi harimo n’aho yagiye akina imikino itandukanye gusa mu ikipe kuri ubu iri gukina imikino yo gushaka itike y’Igikombe cy’Isi yahamagawe mu bakinnyi 33 ariko ntiyashobora kujya ku rutonde rwa nyuma.

Tuyisenge Arsene yageze muri Rayon Sports mu mpeshyi ya 2022 asinya amasezerano y’imyaka ibiri ubu yarangiye. Muri iyi kipe yahatwariye ibikombe bitatu birimo icy’Amahoro 2023, Super Cup ndetse n’igikombe cyari cyateguwe na RNIT Iterambere Fund (RNIT Savings Cup).

APR FC yatangiye kwiyubaka yitegura imikino ya CAF Champions League 2023-2024 ndetse n’irushanwa rya CECAFA Kagame Cup riteganyijwe tariki 2 kugeza 22 Nyakanga 2024 muri Tanzania na Zanzibar.

MENYA UMWANDITSI

Jean Jules Uwimana

Umunyamakuru

@UwimanaJeanJul1

Reba inkuru zose nanditse ( 903 )