Arsenal na Liverpool zirahatanira igikombe cya Community Shield: Ni iyihe icyegukana?

Ikipe ya Arsenal na Liverpool zo mu Bwongereza mu kanya saa kumi n’imwe n’igice zirahurira kuri sitade ya Wembley yo mu Bwongereza mu mukino utoroshye wo guhatanira igikombe cya Community Shield.

Iki gikombe kiruta ibindi mu Bwongereza gihatanirwa mbere gato y’uko shampiyona y’umupira w’Abongereza itangira, kikaba gihatanirwa n’ikipe yatwaye igikombe cya shampiyona ndetse n’iyatwaye FA Cup.

Ikipe ya Liverpool yatwaye igikombe cya Shampiyona y’u Bwongereza giheruka nyuma y’imyaka 30 yari ishize itagitwara irahabwa amahirwe, dore ko shampiyona yarangiye irusha Arsenal amanota 43.

Umutoza wa Liverpool Jurgen Klopp yavuze ko uyu mukino atari uwa gicuti, ahubwo ko ari uw’agaciro gakomeye, ko batagomba kuwusuzugura kuko kuwutsinda byabafasha no gutangira neza umwaka w’imikino.

Ku rundi ruhande ariko, umutoza wa Arsenal Mikel Arteta witegura gutangira umwaka w’imikino atoza Arsenal, dore ko umwaka ushize yawutangiriye hagati, na we ni uwo kwitega hamwe n’abakinnyi be kuri uyu mukino, dore ko yabashije guhesha iyi kipe igikombe cya FA mu mwaka we wa mbere ayitoza.

Buri kipe yakoze ku bakinnyi bayo b’imena, gusa hari n’abandi bataza kugaragaramo kubera ibibazo bafite bitandukanye birimo iby’imvune. Umukinnyi wa Liverpool Virgil van Dijk wari wagize ikibazo cy’imvune mu mukino wa gicuti bakinnye ku wa kabiri n’ikipe ya Salzburg. Ni mu gihe Trent Alexander-Arnold we ataza kugaragara kuri uyu mukino kubera akabazo k’imvune afite.

Igikombe cya Community Shield ni uku giteye
Igikombe cya Community Shield ni uku giteye

Kapiteni wa Liverpool Jordan Henderson, umukinnyi wo hagati Alex Oxlade-Chamberlain ndetse na myugariro Joel Matip na bo bashobora kutagaragara mu mukino kubera imvune.

Ku ruhande rwa Arsenal, umuzamu wabo Bernd Leno yagarutse nyuma y’imvune akaba ashobora gutangira umukino. Myugariro William Saliba agiye gutangira umukino wa mbere mu ikipe ya Arsenal akaba yari yaratijwe mu ikipe ya Saint-Etienne yo mu Bufaransa. Umunya-Brazil Willian Borges da Silva na we agiye gukina umukino we wa mbere mu ikipe ya Arsenal.

Amakipe ya Arsenal na Liverpool, buri kipe imaze gutwara iki gikombe inshuro 15, ikipe igiheruka hafi ikaba ari Arsenal yagitwaye itsinze Chelsea penaliti enye kuri imwe nyuma y’uko umukino wari warangiye ari igitego kimwe ku kindi. Bivuze ko ikipe iza gutsinda indi hagati ya Arsenal na Liverpool ihita isiga indi mu nshuro buri kipe imaze kugitwara.

Ikipe ya Manchester United ni yo imaze kugitwara inshuro nyinshi (21). Ikipe ya Liverpool yo igiheruka muri 2006, mu gihe Arsenal imaze kugitwara inshuro eshatu uhereye muri 2010, ni ukuvuga muri 2014, 2015 na 2017.

Amakipe ya Arsenal na Liverpool agiye guhurira ku mukino wa nyuma wa Community Shield ku nshuro ya kane. Inshuro eshatu bahuriye ku mukino nk’uyu hari mu mwaka wa 1979, 1989 no mu mwaka wa 2002. Ni ku nshuro ya mbere aya makipe agiye guhurira kuri Sitade ya Wembley.

Kuri iyi nshuro urabona ari iyihe icyegukana?

Shakisha izindi nkuru

National Football League 2019/2020

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka