Arsenal na Liverpool zatangiranye ibyishimo Shampiyona y’u Bwongereza

Umunsi wa mbere wa Shampiyona y’u Bwongereza wahiriye ikipe ya Arsenal, Liverpool na Crystal Palace zegukanye intsinzi.

Ikipe ya Arsenal na Fulham ni zo zafunguye shampiyona mu mukino wabereye kuri Stade ya Craven Cottage.

Willian na Aubameyang nyuma yo gutsinda Fulham akanyamuneza kari kose
Willian na Aubameyang nyuma yo gutsinda Fulham akanyamuneza kari kose

Muri uyu mukino umutoza wa Arsenal yari yagiriye icyizere umukinnyi Willian Borges Da Silva wavuye muri Chelsea n’umukinnyi mushya myugariro Gabriel iyi kipe yaguze muri Lille.

Muri uyu mukino ikipe ya Arsenal yatsinze bitagoranye ibitego 3-0.

Yafashijwe na Alexandre Lacazette ku munota wa cyenda. Iki gitego cya Lacazette ni na cyo cyafunguye Shampiyona y’u Bwongereza mu mwaka w’imikino wa 2020-2021.

Arsenal yasumbyaga cyane ingufu Fulham ibindi bitego yabitsindiwe na myugariro Gabriel ku mutwe ku munota wa 49 na Pierre Emerick Aubameyang ku munota wa 57.

Umukinnyi mushya wa Arsenal Gabriel ari mu bitwaye neza muri uyu mukino
Umukinnyi mushya wa Arsenal Gabriel ari mu bitwaye neza muri uyu mukino

Ibi bitego 2 byombi bya nyuma byatsinzwe byose byaturutse ku mipira y’umukinnyi mushya w’iyi kipe Willian uri mu bitwaye neza.

Umukino warangiye Arsenal itsinze ibitego 3-0 byayihaye icyizere cyo gutangira shampiyona neza nyuma yo kwegukana ibikombe bya FA Cup na Community Shield Cup .

Umukino wakurikiyeho watangiye saa kumi. Ikipe ya Crystal Palace yatsinze Southampton igitego kimwe ku busa cyatsinzwe na Zaha ku munota wa 13.

Mu mukino wundi wakurikiyeho, ikipe ya Liverpool, yegukanye igikombe cya shampiyona, yari yakiriye Leeds United na yo yegukanye igikombe cya shampiyona mu cyiciro cya kabiri.

Ni umukino wari ushyushye kandi wihutaga kuko wagaragayemo ibitego 7.

Ikipe ya Liverpool ni yo yatangiye ifungura amazamu kuri penaliti yatewe neza na Mohamed Sarah ku munota wa kane.

Leeds United na yo ntiyacitse intege kuko yaje kwishyura ku munota wa 12 itsindiwe na Harrison ku makosa y’ab’inyuma ba Liverpool.

Ku munota wa 20 Liverpool yongeye kuyobora umukino ku bitego 2-1 nyuma y’igitego cy’umutwe cya Virgil Van Dijk. Gusa na we nyuma y’iminota 10 yakoze ikosa maze Bamford afasha Leeds United kwishyura, biba bibaye ibitego 2-2.

Ku munota wa 33 Mohamed Sarah ku ishoti rikomeye yatsindiye Liverpool igitego cya gatatu bituma ijya kuruhuka iri imbere n’ibitego 3 kuri 2.

Ku munota wa 66 umunya Pologne Klich yishyuriye Leeds United itangira no kugira icyizere cyo gutesha amanota Liverpool kuri stade yayo Anfield road.

Muri uyu mukino wari ufunguye wabonaga harimo no guhangana kw’amayeri y’abatoza Bielsa na Klopp, Liverpool bigoranye, ni yo yatahanye intsinzi yabonetse umukino ugiye kurangira.

Igitego cy’intsinzi cya Liverpool cyabonetse kuri penaliti ku munota wa 88 gitsinzwe na Mohamed Sarah watangiranye shampiyona n’ibitego 3 (hat-trick)

Mohamed Sarah yahiriwe n
Mohamed Sarah yahiriwe n’umunsi wa mbere wa shampiyona kuko yatsinze ibitego 3 (Hat-trick)

Umukino warangiye Liverpool itahukanye intsinzi y’ibitego 4-3.

Leeds yari imaze imyaka 16 idakina icyiciro cya mbere iheruka gutsinda Liverpool mu 2001 ubwo yayitsindaga ibitego 2 kuri 1.

Kuri uyu wa gatandatu amakipe nka Manchester City na Manchester United ntiyakinnye imikino yagombaga gukina kuko yasubitswe bitewe n’uko aya makipe yageze kure mu marushanwa yo ku mugabane w’i Burayi.

Ku munsi wa Kabiri wa shampiyona y’u Bwongereza muri weekend itaha Arsenal izakira West Ham United naho Liverpool yerekeze ku kibuga cya Chelsea ku mukino utegerejwe na benshi.

National Football League 2019/2020

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka