Uyu ni umukino wa kane 4 ugiye guhuza Cameroon na BurkinaFaso bahurira mu gikombe cya Afurika, aho mu mikino itatu (3) amakipe yombi aheruka guhurira muri iki gikombe, Cameroon yatsinzemo imikino ibiri (2) bakanganya umwe (1), harimo n’umukino wahuje amakipe yombi afungura iri rushanwa rya AFCON2021, kuko yari ahuriye mu itsinda ryari irya mbere.

Ikipe ya Burkina Faso mu nshuro ebyiri (2) igiye guhatanira umwanya wa gatatu mu gikombe cya Afurika, inshuro ebyiri (2) baheruka kucyitabira 2017 ndetse na 2021 (kirimo kuba mu 2022 kubera Covid-19), mu 2017 bahatsindiye Ghana igitego 1-0 mu gihe indi nshuro bakiniye umwanya wa gatatu hari mu 1998, aho banganyije na Repubulika iharanira Demokarasi ya Congo ibitego 4-4, ariko batsindwa kuri Penaliti 4-1.

Ikipe y’igihugu ya Cameroon igiye gukinira umwanya wa gatatu mu gikombe cya Afurika ku nshuro ya gatatu, aho mu munshuro 2 baheruka kuwukinira hari mu gikombe cya Afurika cyo mu 1972, nanone yari yakiriye ubwo yatsindaga Repubulika iharanira Demokarasi ya Congo ibitego 5-2, ariko mu 1992 Cameroon itsindirwa ku mukino w’umwanya wa gatatu na Nigeria ibitego 2-1.

Burkina Faso yatsinze nibura igitego muri buri mukino mu mikino itandatu (6) yakinnye muri iki gikombe cya Afurika, kuva mu mikino y’amatsinda kugeza muri ½, byose kandi byatsinzwe n’abakinnyi batandatu (6) batandukanye, aribo Gustavo Sangare, Hassane Bande, Cyrille Bayala, Bertrand Traoré, Dango Ouattara na Blati Touré, aho ikipe yaherukaga kugira abakinnyi benshi batandukanye bayitsindiye ibitego byinshi mu gikombe cya Afurika cya 2015, ari Ghana yatsindiwe n’abakinnyi barindwi (7).

Inshuro eshatu (3) muri eshanu (5) ikipe y’igihugu yakiriye igikombe cya Afurika, yakiniye umwanya wa gatatu imikino yarangiye amakipe yombi anganya bagatera peneliti, kandi igihugu cyakiriye bikarangira gitsinzwe umukino.

Mu 1988 Maroc yari yakiriye iki gikombe yanganyije na Algeria igitego 1-1 ariko igatsindwa kuri penaliti 4-3, mu 1998 Burkina Faso yari yakiriye igikombe cya Afurika, yanganyije na RDC ibitego 4-4, itsindirwa kuri penaliti 4-1 mu gihe Guinea Equatorial yakiriye iki gikombe cya Afurika mu 2015, ku mukino w’umwanya wa gatatu yahatsindiwe na RDC penaliti 4-2 nyuma y’uko amakipe yombi yari yanganyije 0-0.

Burkina Faso igeze hano kuva mu matsinda mu mikino itandatu yakinnye, itsinze imikino itatu (3) inganya umukino umwe (1) itsindwa imikino 2, yinjiza ibitego bitandatu (6) yinjizwa bitandatu, mu gihe Cameroon mu mikino itandatu yose yatsinzemo imikino ine (4) itsindwa umwe(1) inganya umwe (1), yinjizamo ibitego 11 yinjizwa bine (4).

Cameroon igiye guhatanira umwanya wa gatatu nyuma yo gusezererwa muri ½ na Misiri iyitsinze kuri penaliti 3-1, mu gihe umukino wari warangiye amakipe yombi anganyije 0-0, naho Burkina Faso muri ½ na yo yasezerewe n’ikipe y’igihugu ya Senegal iyitsinze ibitego 3-1.