Mu bihugu bitandukanye ku mugabane w’I Burayi, hakomeje gahunda zo gushaka uburyo shampiyona z’umupira w’amaguru zasubukurwa, ndetse hakabanza gupima abakinnyi bose ngo harebwe uko ubuzima buhagaze.

Muri iki cyumweru gishize, ni bwo abakinnyi bose bakina shampiyona y’icyiciro cya mbere muri Espagne (La Liga Santander) ndetse na shampiyona y’icyiciro cya kabiri (La Liga SmartBank), basuzumwe iki cyorezo, aho bagomba byibura gusuzumwa gatatu mbere y’uko shampiyona isubukurwa.

Mu ijoro ryo kuri iki cyumweru, ni bwo ubuyobozi bwa shampiyona ya Espagne bwatangaje ko mu bipimo byose byafashwe, basanze hari abakinnyi batanu banduye Coronavirus, gusa birinda gutangaza amakipe baturukamo.

Mu Budage, ikipe yose yashyizwe mu kato

Muri shampiyona y’abadage Bundesliga, ikipe yo mu cyiciro cya kabiri yitwa Dynamo Dresden basanzemo abakinnyi babiri banduye Coronavirus, bituma iyi kipe yose ishyirwa mu kato k’iminsi 14, bituma n’umukino yari kuzakina tariki 17/05/2020 na Hannover usubikwa.

Biteganyijwe ko shampiyona y’u Budage izasubukurwa mu mpera z’iki cyumweru tariki 16/05/2020, naho muri Espagne n’ubwo itariki itaremezwa, ariko Umuyobozi wa La Liga Javier Tebas yatangaje ko ishobora gusubukurwa Tariki 12/06/2020, ariko ikazakinwa nta bafana bari ku kibuga.