UEFA Champions League: Liverpool na Paris Saint-Germain zatsinzwe imikino ibanza ya 1/8

Mu mikino ibanza ya 1/8 ihuza amakipe yabaye aya mbere iwayo mu bihugu byo ku mugabane w’u Burayi, amakipe ya Liverpool na Paris Saint-Germain ntiyahiriwe kuko yatsinzwe iyo mikino.

Igitego kimwe Paris Saint-Germain yabonye cyatsinzwe na Neymar (Ifoto: Tobias SCHWARZ / AFP)
Igitego kimwe Paris Saint-Germain yabonye cyatsinzwe na Neymar (Ifoto: Tobias SCHWARZ / AFP)

Liverpool yo mu Bwongereza yari yasuye Atletico Madrid yo muri Esipanye, umukino urangira ari igitego kimwe cya Atletico Madrid ku busa bwa Liverpool.

Mu wundi mukino wabereye mu Budage, ikipe ya Borussia Dortmund yari imbere y’abafana bayo yitwaye neza itsinda Paris Saint-Germain yo mu Bufaransa ibitego bibiri kuri kimwe (2 – 1).

Umunya- Norvège, Erling Braut Haaland w’imyaka 19 y’amavuko, yatsindiye Borussia Dortmund igitego cya mbere ku munota wa 69, Neymar acyishyura ku munota wa 75 w’umukino. Bidatinze, Erling Haaland yatsindiye Borussia Dortmund igitego cya kabiri ku munota wa 77, umukino urangira utyo.

Erling Haaland umaze kugira ibitego 10 mu mikino 7 ya Champions League ni we wigaragaje cyane kurusha abandi muri uyu mukino (Man of the Match)
Erling Haaland umaze kugira ibitego 10 mu mikino 7 ya Champions League ni we wigaragaje cyane kurusha abandi muri uyu mukino (Man of the Match)

Ku rundi ruhande, igitego kimwe rukumbi cyatsinzwe n’umunya-Esipanye Saul Niguez ukinira Atletico Madrid ni cyo cyabonetse mu mukino wahuje Atletico Madrid na Liverpool ifite igikombe cy’umwaka ushize.

Iyi mikino ibiri yabaye kuri uyu wa kabiri tariki 18 Gashyantare 2020, ni yo yabimburiye indi mikino ya 1/8. Buri kipe mu makipe 16 igomba gukina imikino ibiri, ubanza n’uwo kwishyura, kugira ngo haboneka amakipe umunani azakomeza muri 1/4 cy’iri rushanwa.

Ku gicamunsi cyo ku wa mbere tariki ya 16 Ukuboza 2019, nibwo i Nylon mu Busuwisi habereye tombola y’uko amakipe azahura muri iyi mikino ya 1/8.

Uko Tombola yagenze:

• Borussia Dortmund yo mu Budage na Paris Saint-Germain yo mu Bufaransa
• Real Madrid yo muri Esipanye na Manchester City yo mu Bwongereza
• Atalanta yo mu Butaliyani na Valencia yo muri Esipanye
• Atletico Madrid yo muri Esipanye na Liverpool yo mu Bwongereza
• Chelsea yo mu Bwongereza na Bayern Munich yo mu Budage
• Lyon yo mu Bufaransa na Juventus yo mu Butaliyani
• Tottenham yo mu Bwongereza na RB Leipzig yo mu Budage
• Napoli yo mu Butaliyani na Barcelona yo muri Esipanye

Imikino ya Atletico Madrid na Liverpool ifite igikombe giheruka, ndetse n’iya Real Madrid ifite ibikombe 13 bya Champions League na Manchester City itozwa na PEP Guardiola ni imwe mu mikino ikomeye itegerejwe na benshi muri iki cyiciro cy’irushanwa rya UEFA Champions League.

Imikino ibanza iraba ku matariki ya 18, 19, 25 na 26 Gashyantare 2020 , mu gihe imikino yo kwishyura izaba ku matariki ya 10, 11, 17 na 18 Werurwe 2020.

Ikipe ya Liverpool ni yo yegukanye igikombe cy’umwaka wa 2018/2019 itsinze Tottenham ku mukino wa nyuma ibitego 2-0.

Umukino wa nyuma w’irushanwa ry’uyu mwaka wa 2019/2020 uzaba tariki ya 30 Gicurasi 2020, kuri Ataturk Olympic Stadium‎ iherereye muri Turkiya.

Ikipe ya Liverpool ni yo ifite igikombe giheruka (Ifoto: Internet)
Ikipe ya Liverpool ni yo ifite igikombe giheruka (Ifoto: Internet)

MENYA UMWANDITSI

National Football League 2019/2020

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka