Ikipe ya Real Madrid yo muri Espagne iheruka kwegukana igikombe cya 2021-2022 yatomboye Chelsea yo mu Bwongereza yatwaye icya 2020-2021. Aya makipe yombi ntabwo ari ubwa mbere ahuriye muri iri rushanwa mu bihe bya vuba kuko mu mwaka w’imikino ushize zahuriye n’ubundi muri 1/4 maze Real Madrid isezerera Chelsea ku giteranyo cy’ibitego 6-5 mu mikino ibiri.

Manchester City yo mu Bwongereza yatomboye Bayern Munich yo mu gihugu cy’u Budage. Aya makipe yombi muri iri rushanwa amaze guhuriramo imikino itandatu aho muri yo buri kipe yatsinzemo itatu(3) mu gihe inshuro ya nyuma ziheruka guhura ari mu mwaka w’imikino wa 2013-2014 na 2014-2015.

Ikipe ya Milan AC na Napoli zo mu Butaliyani na zo zizahura muri 1/4 cy’irangiza. Aya makipe ahuriye muri shampiyona imwe, ni ku nshuro ya mbere agiye guhurira muri UEFA Champions League. Napoli kugeza ubu ni yo kipe iyoboye shampiyona y’u Butaliyani n’amanota 68 mu gihe Milan AC iri ku mwanya wa 4 n’amanota 48.

Ikipe ya Benifica yo muri Portugal yo yatomboye Inter Milan yo mu Butaliyani. Aya makipe yombi ni ubwa mbere agiye guhurira muri Champions League gusa Inter ni ubwa kabiri igiye gukina muri Portugal yikurikiranya uyu mwaka nyuma yo gusezerera FC Porto mu mukino ibiri iyitsinze 1-0.

Imikino ibanza ya 1/4 iteganyijwe hagati ya tariki 11 na 12 Mata 2023 mu gihe iyo kwishyura ari hagati ya tariki 18 na 19 Mata 2023.

Uko amakipe azakomeza muri 1/2 azahura:

Ikipe izakomeza hagati ya Man City na Bayern Munich izakina n’izakomeza hagati ya Real Madrid na Chelsea mu gihe izakomeza hagati ya Inter na Benfica izakina n’izakomeza hagati ya Milan na Napoli.