Imitwe itatu ya Rwatubyaye yerekeje APR muri 1/16

Yanditswe na

Sammy Imanishimwe

27-02-2016 - 19:49' | Ibitekerezo ( 2 )

Apr Fc yageze muri 1/16 mu mikino ya CAF Champions league itsinze Mbabane Swallows ibitego 4-1 mu mukino wabereye kuri Stade ya Kigali i Nyamirambo

Mu marushanwa ahuza amakipe yabaye aya mbere mu bihugu byayo (CAF Champions league), APR Fc ihagarariye u Rwanda yabashije gusezera Mbabane Swalllows yo muri Swaziland, ku bitego 4-1.

APR fc yatangiye isatira cyane Mbabane Swallows

Benedata Janvier ahanganye n'umukinnyi wa Mbabane Swallows

Mu mukino APR Fc yatangiye isabwa gutsinda ibitego 2-0 ngo ibashe gusezerera iyi kipe yo muri Swaziland,yaje guhita ibigeraho mu minota 14 ya mbere,aho ku munota wa 7 gusa APR Fc yari imaze kubona igitego cyatsinzwe na Rwatubyaye Abdul ku mutwe,ku munota wa 14 yongeramo ikindi nanone n’umutwe,maze amahirwe yo gukomeza atangira kwiyongera.

Iyi Coup-Franc ya Iranzi niyo yavuyemo igitego cya mbere

Iranzi Jean Claude ajya gutera koruneri yavuyemo igitego cya kabiri

Gusa byaje kuba bibi ku munota 26 w’umukino,aho Mbabane Swallows yaje kwishyura igitego kimwe,igitego cyatsinzwe n’uwitwa Sanele Mkhweli,aho byari bisobanuye ko umukino urangiye gutya APR yari guhita isezererwa.

Umutoza wa Mbabane Swallows we yari yiyambariye umupira wanditseho "INYATSI"

Ku munota wa 29 Umutoza Rubona Emmanuel yaje guhita yinjiza mu kibuga Nkinzingabo Fiston maze asimbura Ndahinduka Michel uzwi nka Bugesera,ndetse n’igice cya mbere kirangira bikiri 2-1.

Ku munota wa 58 w’umukino,Rubona Emmanuel yaje kongera gusimbuza,maze Djihad Bizimana avamo hinjira Sibomana Patrick,maze ku munota wa 67 APR Fc kuri koruneri yari itewe na Iranzi Jean Claude Rwatubyaye Abdul aza gushyiramo igitego cya 3.

Abdul Rwatubyaye ashimira "ALLAH' wari umuhaye igitego cya gatatu

Rwatubyaye Abdul yaje guhita atahana umupira nk'umukinnyi winjije ibitego bitatu mu mukino

Rwatubyaye ashinirwa na Didier Bizimana nawe wahoze ari myugariro muri APR Fc

Umupira uri kugana ku musozo,APR Fc yaje gutsinda igitego cya kane,igitego cyatsinzwe na Sibomana Patrick wari wagiyemo asimbura,ndetse uza kurangira ari 4-1 maze Mbabane Swallows irasezererwa APR Fc ikomeza muri 1/16 cy’irangiza aho izahura na Young Africans yo muri Tanzania.