Amakipe ahuruza abafana benshi mu Mujyi wa Muhanga nka Magic family na les Onze du Dimanche, niyo ahabwa amahirwe yo kwakira akayabo ka miliyoni zigera kuri 60 zitangwa n’akarere ka Muhanga ngo zifashe ikipe ya AS Muhanga.

AS Muhanga ubu niyo ya nyuma muri Shampiona

Umukozi w’Akarere ka Muhanga ushinzwe umuco na Siporo Gashugi Innocent avuga ko ikibazo cya AS Muhanga kiri mu bayobozi bayo batitanga nk’uko amakipe y’abatarabigize umwuga yiyitaho akishakira ubushobozi kandi akagaragaza umukino ushimishije.

Agira ati, “Ikipe ni mu mutwe iyo hadakora ntabwo yatera imbere, iyo hatumijwe inama rusange abantu barabura mu gihe aba bo bitabira, birashoboka ko ubushobozi bwahabwaga AS Muhanga bwahabwa aya makipe hanyuma akaba ari yo yishakamo ikipe ikomeye”.

Gashugi asaba amakipe y’abatarabigize umwuga kuba yakwemera gufata ikipe ya AS Muhanga kugira ngo irusheho gukomera

Gashugi ntavuga igihe AS Muhanga ishobora kuzegurirwa abanyamujyi batabigize umwuga cyakora akemeza ko aho ikipe igeze bitoroshye gukomeza kurebera yitwara nabi.

Mu mikino ya nyuma yahuje amakipe ya Magic Family na les 11 du dimanche byagaragaye ko abanyamuhanga bitabira imikino ikibazo ari ukutabona ibibashimisha dore ko Stade yari yuzuye abafana b’aya makipe n’ubwo umukino utishyujwe.

Ikipe ya Magic yatwaye igikombe itsinze les 11 ivuga ko yiteguye gufasha AS Muhanga kugera ku mukino uryoheye ijisho kandi ikipe ikagera kure muri Shampiyona.

Ikipe ya Magic yatwaye igikombe yemera gufasha ikipe ya AS Muhanga

Nsengimana Vincent utoza ikipe ya Magic agira ati, “Twe turitanga tugamije gushimisha abaturage kuko ibyo dushora mu ikipe biruta kure ibyo twunguka, twiteguye gufasha ikipe ya AS Muhanga nayo ikagera ku rwego rushimishije”.

Amakipe 16 niyo yitabiriye irushanwa ryateguwe n’Akarere ka Muhanga hagamijwe ubusabane bw’abaturage no kubakangurira gahunda za Leta aho ikipe ya mbere yahembwe ibihumbi 300frw iya kabiri igatwara 200frw naho iya gatatu ihembwa ibihumbi 100frw, mu gihe amarushanwa atwaye miliyoni imwe gusa.

MENYA UMWANDITSI

Ephrem Murindabigwi

Umunyamakuru

@ murieph

Reba inkuru zose nanditse ( 1468 )