Nkuko tubikesha itangazo rigenewe abanyamakuru ryatanzwe n’ubuyobozi bw’Ishirahamwe ry’umukino wa Basketball mu Rwanda, buvuga ko iyi nama yabaye kuri iki cyumweru tariki ya 17 Gicurasi 2020 yitabirwa n’amakipe 15 muri 20 yitabiriye shampiyona, ikaba yabaye hifashishijwe uburyo bw’ikoranabuhanga mu rwego rwo kwirinda Covid-19.

Imyanzuro y’Inama

Mu rwego rwo kugabanya igihe imikino yakinwagamo no kugira ngo iyi gahunda yubahirizwe, hemejwe ko buri kipe yazajya ikina nibura imikino ibiri mu cyumweru, ndetse byaba ngombwa mu buryo budasanzwe hakaba hanakwitabazwa umukino wa gatatu ariko bikaba ku makipe yose ntayirenganyijwe.

Mu rwego rwo kugabanya igihe imikino isoza (playoffs) yakinwagamo, hemejwe ko imikino ya ½ yaba itatu aho kuba itanu, hanyuma imikino ya nyuma ikaba itanu aho kuba irindwi.

Mu gihe haba impinduka mu mabwiriza yashingiweho hafatwa ibi byemezo

Hemejwe ko kubera ibihe turimo, ikipe izagira imbogamizi, zaba izitewe n’ubushobozi cyangwa se izindi zifitanye isano n’ingaruka za COVID-19, ishobora kwandika isaba guhagarika kwitabira muri shampiyona, kandi ntifatirwe ibihano nkuko biteganywa mu bihe bisanzwe.

Shampiyona ya Basketball yahagaze tariki ya 15 Werurwe 2020 ikipe ya REG BBC iri ku mwanya wa mbere. Banki ya Kigali ni yo muterankunga mukuru wa shampiyona ya Basketball mu Rwanda, aho muri uyu mwaka w’imikino 2019-2020 igomba gutanga miliyoni 135 z’amafaranga y’u Rwanda.