Kuri uyu wa Gatanu tariki ya 10 Gashyantare 2023, nibwo FERWABA yungutse ikibuga gishya cy’uyu mukino, nyuma yo kuvugururwa kigashyirwa ku rwego rwo kwakira imikino.

Ni nyuma yo kuvugurura iyi nzu y’imikino ikagurwa ndetse ikanashyirwa no ku rwego rwo kwakira imikino ya shampiyona, ibi bikaba byarakozwe n’ishami rya NBA muri Afurika, ku bufatanye na FERWABA ndetse n’ishuri rya Lycée de Kigali.

Mu muhango wo kumurika iki kibuga wafunguwe ku mugaragaro na Minisitiri wa siporo mu Rwanda, Aurore Mimosa Munyangaju, hari kandi Perezida wa FERWABA, Desire Mugwiza, umuyobozi wa NBA Africa, Victor Williams, umuyobozi ushinzwe ingamba n’ibikorwa muri NBA Africa, George Land n’umuyobozi w’ibikorwa by’umukino basket muri NBA Africa, Frank Traoré.

Iki kibuga, kizafasha urubyiruko rurenga 4,000 ruturuka muri Kigali no hafi yaho rukina Basketball, kubona aho gukinira ndetse uyu mushinga ukaba ari ikimenyetso cyo gushimangira ubufatanye bukomeye hagati ya NBA Africa na FERWABA, no gutanga ibikorwa remezo bihagije ku bakinnyi ba Basketball bafite impano, kandi bifuza kwerekana ubuhanga n’ubushobozi bwabo.

Ibi bikaba binakubiye mu magambo ya Mugwiza, wagize ati “Twabigize inshingano zacu rwose ku nkunga y’abafatanyabikorwa bacu, gukomeza gushora imari mu iterambere ry’ibikorwa remezo by’ikibuga kugeza Basketball y’u Rwanda izamutse ikagera kure. Iyi ni intangiriro.”