Ikipe y’u Rwanda yiganjemo abakobwa bakina mu mashuri yisumbuye na za kaminuza, yatangiye ikina neza cyane ndetse irangiza agace ka mbere k’umukino (quart-temps).

Nyuma yo kuvunika kwa Sandra Irakoze wabafashaga cyane kugeza imipira ku batsinda, APR yatangiye kubarusha imbaraga n’inararibonye kuko yakinishaga abakinnyi bakuze kandi basanzwe bamenyereye shampiyona, maze umukino urangira APR itsinze ikipe y’igihugu U18 amanota 61 kuri 48.

Kapiteni w’ikipe y’igihugu y’abakobwa, Denise Uwase, yadutangarije ko gukina n’ikipe nka APR yatwaye igikombe cya shampiyona bibafasha kwitegura neza, kuko bituma batinyuka amakipe akomeye bazahura mu irushanwa ry’akarere ka gatanu.

Uwase usanzwe akinira Kaminuza y’u Rwanda avuga ko hari amakosa bakora kubera ko benshi muri bo batamenyereye amarushanwa, ariko ngo bizeye ko bazagera igihe cy’irushanwa nyirizina ry’akarere ka gatanu baramaze kuyakosora.

Yabisobanuye muri aya magambo: “Turacyari bato kandi dukeneye kumenya, kandi amabwiriza abatoza baduha tuyumva vuba kandi tukagerageza kuyashyira mu bikorwa ku buryo dufite icyizere ko imikino y’akarere ka gatanu izagera tumeze neza nta kibazo tukanitwara neza”.

Charles Mbazumutima, umutoza w’iyi kipe wungirije avuga ko bikibagoye gutegura ikipe neza nk’uko babyifuza kuko hari abakinnyi biga i Kabgayi bataraza mu ikipe y’igihugu kubera ko bakirimo gukora ibizamini, gusa ngo nibaza bose ikipe izarushaho gukomera.

Iyi kipe iherutse mu marushanwa yabereye i Burundi, izakomeza gukina mikino ya gicuti kugira ngo imenyere neza, dore ko ari ubwa mbere ikipe y’u Rwanda y’abakobwa bo kuri uru rwego yitabiriye amarushanwa mpuzamahanga.

Abakinnyi bahamagawe mu mwiherero ni Umwizerwa Vanessa, Kabanyana Ange, Iradukunda Muzigabanga Cynthia, Manishimwe Genevieve, Umutoni Gisele, Nzaramba Cecile, Niyonsaba Delice, Micomyiza Rosine, Irakoze Sandra, Kanyamibwa Marie Claire, Gakwenzire Solange, Uwase Denise, Yamfashije Jeanne, Immacule Nyirahumure, Nancy Ishimwe na Alice Kanzayire.

Theoneste Nisingizwe