Nyuma y’amarushanwa yo guhitamo abana bafite impano yabereye hirya no hino mu Rwanda, tariki ya 27/12/2013 nibwo abakinnyi 120 (harimo abahungu 80 n’abakobwa 40) bitwaye neza kurusha abandi muri ayo marushanwa, bahurijwe kuri Stade ntoya i Remara, bakora andi marushanwa ya nyuma yagaragaje abakinnyi bajya mu makipe y’igihugu.

Ayo marushanwa yamaze iminsi itatu, yasojwe ku cyumweru. Maze abatoza bagendeye ku kuntu buri mukinnyi yitwaye n’umwaka akinaho, bemeza abakinnyi 24 bazajya mu ikipe y’igihugu y’abahungu batarengeje imyaka 18.

Hanatoranyijwe abakobwa 24 bazajya mu ikipe y’abakobwa batarengeje imyaka 18 ndetse hanatoranywa abandi 24 bagize ikipe y’abatarengeje imyaka 16 mu bahungu no mu bakobwa.

Umutoza mukuru w’ikipe y’igihugu ya Basketball, Moise Mutokambali, avuga ko abo bakinnyi batoranyijwe bazashyirwa mu bigo bazajya bigiramo banakina Basketball, bakazabaha abatoza bakomeye bazajya babakurikirana kugirango batazasubira inyuma.

Abakinnyi batarengeje imyaka 18 batoranyije haba mu bahungu no mu bakobwa, bazakinira igihugu mu marushanwa atandukanye azaba muri uyu mwaka, gusa ngo urwo rutonde sirwo rwa nyuma kuko haziyongeramo abandi ndetse hakazagira n’abavamo bitewe n’uko bazagenda bitwara.

Umutoza Mutokambali avuga ko abakinnyi batarengeje imyaka 16 batoranyijwe kugirango bakomeze gukurikiranwa, kugirango mu myaka iri imbere bazabe aribo bashyirwa mu ikipe y’igihugu y’ingimbi hatabeyeho kongera gushakisha hirya ni hino.

Umuyobozi wungirije mu ishyirahamwe ry’umukino wa Basketball mu Rwanda, Freddy Makuza, avuga ko gahunda yo gushaka abakinnyi bafite impano izajya ikorwa buri mwaka, kugirango buri gihe u Rwanda rujye ruba rufite aho rwakura abakinnyi b’abahanga mu byiciro bitandukanye muri Basketball.

Theoneste Nisingizwe