Ni imikino ya kamarampaka yatangiye kuri uyu wa Gatanu tariki 27 Nzeri 2024 nyuma ya basaza babo bo basoje mu cyumweru gishize ndetse igikombe kikaba cyaregukanywe n’ikipe ya APR BBC.

Mu mukino wabanje, ikipe ya APR WBBC yatsinze ikipe ya GS Marie Reine y’i Rwaza amanota 96 kuri 65 aho ikipe ya APR ari yo yayoboye uduce twose tw’umukino.

Agace ka mbere ikipe ya APR yakegukanye ku manota 27 kuri 18, agace ka kabiri ikegukana ku manota 22 kuri 8, agace ka gatatu yongera kukegukana ku manota 26 kuri 21 naho agace ka nyuma ikegukana ku manota 21 kuri 18 ya GS Marie Reine y’i Rwaza.

Mu mukino wa kabiri wakurikiyeho, ikipe ya REG Women Basketball Club yatsinze biyoroheye cyane ikipe ya Kepler Women Basketball Club amanota 107 kuri 45.

Ni umukino utagoye cyane ikipe ya REG WBBC kuko iyi kipe ya Sosiyete y’u Rwanda ishinzwe Ingufu, yegukanye uduce twose tw’umukino Kepler WBBC idakoramo.

Ikipe ya REG WBBC kandi yagiye gukina uyu mukino ifite umutoza mushya, umunya Esipanye (Spain) Julian Martinez watozaga umukino we wa mbere.

Muri uyu mukino, umukinnyi Micomyiza Rosine wa REG BBC ni we watsinze amanota menshi kuko yatsinze amanota 21 wenyine.

Umukino wa kabiri uteganyijwe kuri iki Cyumweru tariki ya 28 Nzeri 2024 muri Petit Stade.