Ni umukino wabaye kuri uyu wa Kane tariki ya 18 Gashyantare 2021 muri Salle Mohammed Mzali Arena. Amakipe yombi yakinaga umukino wa Kabiri mu itsinda rya Kane muri iki cyiciro . Umukino wa mbere warangiye Nigeria itsinze Sudani y’Epfo, mu gihe u Rwanda rwatsinzwe na Mali.

Ni umukino watangiye uyobowe n’u Rwanda mu duce tubiri twawo twa mbere aho agace ka mbere karangiye u Rwanda rutsinze amanota 22 kuri 14 ya Nigeria. Agace ka Kabiri u Rwanda rwatsinzemo amanota icyenda mu gihe Nigeria yatsinzemo amanota 16. Byatumye agace ka mbere karangira u Rwanda rufite amanota 31 kuri 30 ya Nigeria.

Agace ka Gatatu u Rwanda rwagasoje rugatakaje rwari rufite amanota 41 kuri 44 ya Nigeria. Agace ka Kane ari na ko ka nyuma, ikipe y’u Rwanda yakozemo amakosa menshi arimo : kutumvikana, gutakaza imipira myinshi no kubura uyobora umukino, birangira Nigeria itsinze amanota 12 muri aka gace u Rwanda rutsinda amanota 10, igiteranyo cy’umukino wose kigaragaza ko Nigeria itsinze u Rwanda 64 kuri 51.

Urutonde rw’uko itsinda rya Kane rihagaze

1. Nigeria : Imikino itanu, amanota 10
2. Sudani y’Epfo: Imikino ine, amanota 6
3. Mali : imikino ine, amanota 6
4 Rwanda : Imikino itanu, amanota 5

U Rwanda ruzagaruka mu kibuga ku wa Gatandatu tariki ya 20 Gashyantare 2021 aho ruzakina na Sudani y’Epfo mu gihe Nigeria izacakirana na Mali.