Mu nkuru yacu tugiye kugaruka ku musaruro mbumbe w’amakipe ya Kepler yagarutsweho cyane muri shampiyona za Volleyball na Basketball nyuma yo kwitwara neza mu mwaka wa 2024.

Nibura muri uyu mwaka w’imikino wa wa 2024, amakipe ya Kepler yegukanye ibikombe bitatu n’imidari y’umulinga ndetse na feza mu gihe yabaga ategukanye ibikombe.

Ubusanzwe amakipe ya Kepler abarizwa mu kitwa Kepler Sports, nayo ibarizwa muri Kaminuza ya Kepler, bafite amakipe 4 arimo abiri akina mu cyiciro cya mbere muri shampiyona ya Basketball mu Rwanda abagabo n’abagore, muri uyu mukino kandi Kepler ifite n’indi kipe y’abato wavuga ko ari nk’irerero ryayo ryitwa (Keplerian), aho ikina mu cyiciro cya kabiri muri shampiyona ya Basketball ahanini akazi kayo akaba ari ako gutegurirwamo impano z’abakiri bato.

Si Basketball gusa kuko Kepler uyu mwaka yanaserukanye ikipe ya Volleyball y’abagabo ndetse urebye akaba ari nayo yegukanye ibikombe ndetse ikanagera ku mikino ya nyuma myinshi ugereranyije n’iya Basketball ndetse ubu Kepler ikaba yamaze no gushyiraho ikipe y’abagore.

Umusaruro waya makipe amaze umwaka umwe ashinzwe

Mu mwaka wa 2023, urebye nibwo Kepler yatangiye kumvikana mu bikorwa bya siporo ubwo hashingwaga ikipe ya Kepler Basketball (Keplerians), yashyizwe mu cyiciro cya kabiri muri shampiyona ya Basketball. Nyuma y’umwaka umwe gusa yahise izamuka mu cyiciro cya mbere cya shampiyona ya Basketball 2024, icyo gihe yatozwaga n’umutoza Rene Sahabu, wayihesheje umwanya wa kabiri nyuma ya Orion Basketball club.

Iyi kipe ikigera mu cyiciro cya mbere yiswe Kepler Basketball Club ndetse yinjirana na bashiki babo ba Kepler Women Basketball Club. Mu mwaka wa mbere w’aya makipe wavuga ko wabaye umwaka udasanzwe bijyanye n’umusaruro yatanze ujyendeye kubo bari bahanganye cyane nk’ibigugu birimo REG, APR, Patriots, Espoir ndetse n’andi makipe y’ubukombe.

Kepler Volleyball Club

Mu mwaka umwe gusa ishinzwe, iyi kipe wavuga ko ariyo yayoboye izindi mu makipe ya Kepler mu mwaka wa 2024, mu marushanwa yakinnye yasaruye ibikombe bibiri, n’imidari itandukanye aho yakinaga imikino ya nyuma ariko nti bashe kwegukana igikombe.

Irushanwa rya mbere iyi kipe yakinnye ni ’Tax Payers Appreciation Volleyball Tournament’, aho yegukanye umwanya wa kabiri nyuma yo gutsindirwa ku mukino wa nyuma n’ikipe ya APR VC.

Kepler Volleyball Club, yahise yitabira irushanwa rya (CAVB Zone V Club Championship) rihuza amakipe yabaye aya mbere mu Karere. Aha iyi kipe yaje kwegukana umwanya wa kane inyuma ya Police VC yegukanye igikombe, Sport-S Volleyball Club yo mu gihugu cya Uganda ndetse na APR VC.

Kepler Volleyball Club itozwa na Nyirimana Fidele, umwe mu batoza bafite amateka muri Volleyball y’u Rwanda, yaje kwitabira ndetse inegukana irushanwa rya Memorial Kayumba itsinze ikipe ya Police VC ku mukino wa nyuma.

Muri uyu mwaka kandi ikipe ya Kepler VC yitabiriye irushanwa rya GMT (Genocide Morial Tournament), aho iyi kipe yegukanye umwanya wa gatatu itsinze ikipe ya APR VC.

Muri uyu mwaka kandi ku nshuro yayo ya mbere ikinnye irushanwa ryo kwibohora (Liberation Cup) ryabereye i Kigali muri Petit Stade, Kepler VC yaje kuryegukana itsinze ikipe ya Police VC ku mukino wa nyuma.

Muri Kamena uyu mwaka kandi Kepler VC yitabiriye irushanwa mpuzamahanga rya KAVC (Kampala Amateurs Volleyball Club) ryabereye mu gihugu cya Uganda aho iyi kipe yasezerewe igeze muri 1/4.

Ku rwego rwa shampiyona y’icyiciro cya mbere muri shampiyona ya Volleyball, Kepler VC yageze mu mikino ya kamarampaka (Playoffs) ndetse igera no ku mukino wa nyuma aho yatsinzwe n’ikipe ya APR VC yegukanye igikombe ku mikino 2 kuri 1.

Kepler Women Basketball Club

Mu mwaka w’imikino wa 2024, iyi kipe yakinnye amarushanwa ane arimo Shampiyona y’icyiciro cya mbere, Rwanda cup, Legacy Tournament ndetse na Genocide Memorial Tournament.

Muri aya marushanwa twagarutseho haruguru, iyi kipe y’abagore ya Kepler yabashije kwegukanamo irushanwa rimwe rya Leagacy Tournament, itsinze ikipe ya REG WBBC amanota 51 kuri 47. Yegukana kandi umwanya wa gatatu mu irushanwa rya Rwanda Cup ndetse n’umwanya wa gatatu mu irushanwa rya GMT (Genocide Morial Tournament) ndetse iyi kipe ikaba iri no mu mikino ya kamarampaka (Playoffs) ihuza amakipe ane yabaye aya mbere muri shampiyona.

Kepler Basketball Club (Abagabo)

Kepler BBC nayo wari umwaka wayo wa mbere muri shampiyona y’icyiciro cya mbere muri shampiyona ya basketball mu Rwanda. Si umwaka wavuga ko wayigendekeye neza ugereranyije nandi makipe twavuze haruguru, gusa nanone si umwaka wabaye mubi kuko iyi kipe yabashije kwegukana umwanya kane muri shampiyona ya Basketball inyuma APR BBC yegukanye shampiyona ku nshuro ya kabiri yikurikiranya, Patriots BBC yegukanye umwanya wa kabiri ndetse na REG BBC yabaye iya gatatu.

Ubwo shampiyona yasozwaga mu cyumweru gishize, iyi kipe ya Kepler BBC ni nayo yavuyemo umukinnyi wahize abandi muri shampiyona (Most Valuable Player), Chad Bowie Jordan ndetse akanatsinda amanota menshi kurusha abandi, kuko yatsinze amanota 410.