Alain Boileau ni we wegukanye agace ka kabiri ka Tour du Rwanda 2021

Alain Boileau ukomoka mu Bufaransa ni we wegukanye agace ka kabiri ka Tour du Rwanda 2021, kakaba ari agace Kigali-Huye ka Km 120.5, isiganwa ryabaye kuri uyu wa Mbere tariki 3 Gicurasi 2021.

Alain Boileau ni we wegukanye agace ka kabiri ka Tour du Rwanda 2021
Alain Boileau ni we wegukanye agace ka kabiri ka Tour du Rwanda 2021

Ku i Saa Tatu zuzuye ni bwo abakinnyi 75 bari bahagurutse mu mujyi wa Kigali rwagati, imbere y’inyubako ya CHIC berekeza mu karere ka Huye aho bagombaga gusiganwa ku ntera ya Kilometero 120.5.

Bamaze kugenda Kilometero eshanu, ni bwo abakinnyi batatu ba mbere barimo Nsengimana Jean Bosco (Rwanda), Tewelde wa Eritrea, ndetse na Manizabayo Eric wa Benediction Ignite bahise batoroka abandi batangira kuyobora isiganwa.

 Nsengimana Jean Bosco (Rwanda), Tewelde wa Eritrea, ndetse na Manizabayo Eric wa Benediction Ignite bageze mu mujyi wa Muhanga bakiyoboye
Nsengimana Jean Bosco (Rwanda), Tewelde wa Eritrea, ndetse na Manizabayo Eric wa Benediction Ignite bageze mu mujyi wa Muhanga bakiyoboye

Aba bakinnyi bakomeje kuyobora isiganwa ari nako bagenda bongere ibihe basigaga ababakurikiye, kugera ubwo barenze mu mujyi wa Muhanga bashyizemo ikinyuranyo cy’iminota 4 n’amasegonda 10, aha bari bamaze kugenda Kilometero 54.

Ubwo aba bakinnyi basatiraga umujyi wa Ruhango, igikundi cy’inyuma cyaje kubashikira, haza guhita hagenda abandi bakinnyi babiri Bernardo Suaza wa Medellin na Valentin Ferron wa Total-Direct Energie, gusa aba nabo ntibatinze imbere kuko igikundi cyongeye kubafata.

Barenze mu Butantsinda bwa Kigoma berekeza Gasoro, abafaransa babiri ari bo Valentin Ferron (Total-Direct Energie) na Alan Boileau (B&B Hotels), baje kongera gucika abandi bagenda bonyine, kugera ku Kilometero cya 94 ubwo bari bagiye kugera ahazwi nko Kuri ISAR Rubona.

Nyuma yaho igikundi cy’abakinnyi 32 kirimo Ferron na Gaillard (D.Energie), Eyob Metkel ( Terengganu), Restrepo na Bisolti (Androni), Lagab (Algérie),Mugisha (Rda),Main, Ormiston na Nigrini (Pro Touch), Sevilla (Medellin), Goldstein na Piccoli (Israël), Nsengiyumva (SACA), Pacher, Boileau na Gautier (B&B Hotels), Uhiriwe (Rwanda) ni bo bahise bayobora isiganwa kugera binjiye mu mujyi wa Huye.

Itsinda ririmo Bryan Sanchez ryari riyoboye isiganwa mu bilometero bya nyuma
Itsinda ririmo Bryan Sanchez ryari riyoboye isiganwa mu bilometero bya nyuma

Umufaransa Alan Boileau wa B&B Hotels ni we waje kwegukana isiganwa aciye abandi mu rihumye bagendanaga, aho yakoresheje 3h07’14”, akurikirwa na Umba Lopez Abner Santiago wa Androni, we wakoresheje 3h07’14”, uyu akaba ari nawe wahise yambara Maillot Jaune.

Kuri uyu wa Kabiri, abasiganwa baraza guhaguruka mu mujyi wa Nyanza ku i Saa zuzuye, bakazasoreza i Gicumbi bakoze intera ya Kilometero 171.6, bakazasoza ahagana 13h29.

Alan Boileau w’imyaka 21, abaye Umufaransa wa kabiri wegukanye agace (étape) muri Tour du Rwanda, nyuma ya Sebastien Trouche wagatwaye muri 2010.

Umunyarwanda uri imbere ku rutonde rusange ni Uhiriwe Byiza Renus ukinira Team Rwanda, mu gihe Manizabayo Eric ari we uyoboye abandi mu kuzamuka (Meilleur Grimpeur)

Abakinnyi 10 ba mbere kuri etape Kigali- Huye

1. Alan Boileau (B&B Hotels, Fra), 3h07’14”
2. Umba Lopez Abner Santiago (Androni, Col), 3h07’14” + 06”
3. Sanchez Vergara Brayan Stiven (Medellin, Col), 3h07’14”+ 08”
4. Vahtara Norman (Israel Start-up Nation, Est), ibihe bimwe
5. Marchand Gianni (Tarteletto-Isorex, Bel), ibihe bimwe
6. Alex Hoehn (Wildlife Generation, USA), ibihe bimwe
7. Restrepo Jhonatan Valencia (Androni, Col) , ibihe bimwe
8. Salim Kipkemboi (Bike Aid, Kenya), ibihe bimwe
9. Quentin Pacher (B&B Hotels, Fra), ibihe bimwe
10. Valentin Ferron (Direct Energie, Fra), ibihe bimwe

Urutonde rusange nyuma y’iminsi ibiri

1. Umba Lopez Abner Santiago (Androni, Col), 5h41’03”
2. Sanchez Vergara Brayan Stiven (Medellin, Col), 5h41’03” + 02”
3. Alex Hoehn (Wildlife Generation, USA), 5h41’03” + 02”
4. Restrepo Jhonatan Valencia (Androni, Col) , 5h41’03” + 02”
5. Quentin Pacher (B&B Hotels, Fra), 5h41’03” + 02”
6. Salim Kipkemboi (Bike Aid, Kenya), 5h41’03” + 02”
7. James Piccoli (Israel Start-up Nation, CAN), 5h41’03” + 02”
8. Valentin Ferron (Direct Energie, Fra), 5h41’03” + 02”
9. Vahtara Norman (Israel Start-up Nation, Est), 5h41’03” + 02”
10. Uhiriwe Byiza Renus (Team Rwanda), 5h41’03” + 02”

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka